Pune : शेजारच्या महिलेच्या त्रासाला कंटाळून तरुणाची आत्महत्या; वाचा नेमकं काय घडलं

सागर आव्हाड, झी मीडिया, पुणे : पुण्यात (Pune) महिलेच्या त्रासाला कंटाळून एका तरुणाने पाण्यात उडी मारून आत्महत्या (Suicide) केल्याची धक्कादायक घटना समोर आली आहे. या प्रकरणी महिलेविरुद्ध खडक पोलिसात गुन्हा दाखल करण्यात आला आहे.

नयन नरेंद्र मोरे (20,रा. हरकारनगर भवानी पेठ) असे तरुणाचे नाव आहे. सोमवारी त्याचा मृतदेह वैदवाडी कॅनॉल हडपसर येथे आढळून आला आहे. खडक पोलिसांनी या प्रकरणी जेबा सय्यद (30) या महिलेला अटक केली आहे.

पोलिसांनी दिलेल्या माहितीनुसार, संबंधित तरुण आणि महिला शेजारी राहायला होते. आदल्या दिवशी किरकोळ कारणाहून त्यांच्यात भांडण झाले होते. त्यावेळी जेबा हिने त्या तरुणाला जीवे मारण्याची धमकी दिली होती. मात्र दुसऱ्या दिवशी नयन हा घरातून निघून गेला. तो रात्री उशिरापर्यंत घरात आलाच नाही. त्यामुळे त्याचा शोध घेण्यासाठी त्याच्या घरच्यांनी समर्थ पोलिसात तक्रारही दिली होती. मात्र सोमवारी नयनचा मृतदेह हडपसर येथील कॅनॉलमध्ये आढळून आला.

त्यानंतर मुलाच्या नातेवाईकांनी समर्थ पोलिसात धाव घेत शेजारील महिलेविरुद्ध आटनहत्येस प्रवृत्त केल्याची तक्रार दाखल केली. त्यावरून पोलिसांनी जेबा विरोधात आत्महत्येस प्रवृत्त केल्याचा गुन्हा दाखल केला आहे. या प्रकरणी अधिक तपास खडक पोलीस करत आहेत.