Delhi Election EXIT Poll: भाजपा 27 वर्षांचा दुष्काळ संपवणार की आपची हॅट्ट्रिक होणार? एक्झिट पोलने स्पष्ट केलं चित्र

Zeenia AI Exit Poll: दिल्ली विधानसभा निवडणुकीत आम आदमी पक्ष आणि भाजपात थेट लढत होत आहे. एकीकडे आम आदमी पक्ष राजधानीत तिसऱ्यांदा आपलं सरकार स्थापन करण्याच्या प्रयत्नात असेल तर दुसरीकडे भाजपा आपला 27 वर्षांचा दुष्काळ संपवण्याची आशा करत आहे. यादरम्यान झी न्यूजची एआय अँकर झिनियाने एक्झिट पोलच्या माध्यमातून दिल्लीत नेमकं काय चित्र असेल याचा अंदाज लावला आहे. 

दिल्लीत तिसऱ्यांदा आपचं सरकार?

झिनियाने दर्शवलेल्या अंदाजानुसार, दिल्लीत पुन्हा एकदा आम आदमी पक्षाची सत्ता येण्याची शक्यता आहे. असं झाल्यास आम आदमी पक्ष सलग तिसऱ्यांदा सत्तेत बसेल. एक्झिट पोलनुसार, दिल्लीत आम आदमी पक्षाला 33 ते 38 जागा मिळण्याची शक्यता आहे, तर भाजपाला 31 ते 36 जागांवर विजय मिळेल असा अंदाज आहे. काँग्रेसला मात्र फक्त 2 जागा मिळण्याचा अंदाज वर्तवण्यात आला आहे. इतरांनाही 2 जागा मिळतील. दिल्लीत सरकार स्थापन करण्यासाठी 36 चा बहुमताचा आकडा पार करावा लागणार आहे.

2020 मधील विधानसभा निवडणुकीत आम आदमी पक्षाने 62 आणि भाजपाने 8 जागा जिंकल्या होत्या. त्यामुळे एक्झिट पोलनुसार भाजपाला या निवडणुकीत फार मोठं यश मिळताना दिसत आहे. त्यांचा जागा 8 वरुन थेट 36 पर्यंत जात आहेत.  

इतर एक्झिट पोलमध्ये काय अंदाज वर्तवला आहे?

1) मॅट्रिझच्या एक्झिट पोलनुसार, दिल्लीत भाजपाची सत्ता येताना दिसत आहे. आम आदमी पक्षाला 32 ते 37, भाजपाला 35 ते 40 आणि काँग्रेसला 0-1 जागा मिळेल असा अंदाज वर्तवण्यात आला आहे. 

2) चाणक्यनेही आपल्या एक्झिट पोलमध्ये भाजपालाच पसंती दिली आहे. त्यांच्यानुसार, भाजपाला 39 ते 44, आपला 25 ते 28 आणि काँग्रेसला फक्त 2 ते 3 जागांवर विजय मिळण्याची शक्यता आहे. 

3) पोल डायरीच्या एक्झिट पोलमध्येही भाजपाचीच सत्ता येताना दिसत आहे. एक्झिट पोलनुसार, भाजपाला 42 ते 50, आपला 18 ते 25 आणि काँग्रेसला 0-2 जागा मिळतील असा अंदाज आहे. 

दिल्लीचे राजकीय समीकरण

राजधानी दिल्लीतील सर्व 70 जागांसाठी होणाऱ्या निवडणुकीत आम आदमी पार्टी, भाजप आणि काँग्रेसमध्ये तिरंगी लढत आहे. आम आदमी पार्टी (आप) हॅट्ट्रिक करत सरकार वाचवण्याचा प्रयत्न करत आहे, तर भाजप गेल्या 27 वर्षांचा दुष्काळ संपवण्यासाठी सर्वतोपरी प्रयत्न करत आहे. दुसरीकडे, काँग्रेस 2013 नंतर पहिल्यांदाच सत्तेत येण्याचे स्वप्न पाहत आहे. 

झिनियाचा एक्झिट पोल सर्वात अचूक 

झी न्यूजने नेहमीच अचूक आणि विश्वासार्ह एक्झिट पोल दिले आहेत. 5 फेब्रुवारीची संध्याकाळ हा चॅनलच्या निवडणुकीच्या अहवालाचा शेवटचा टप्पा असेल जिथे दिवसभर दिल्लीतील 70 मतदारसंघांमधून थेट कव्हरेज केले गेले. यानंतर मतदान संपताच एक्झिट पोलचे निकाल समोर येतील. गेल्या लोकसभा निवडणुकीत झिनियाचा एक्झिट पोल वास्तविक निकालांच्या सर्वात जवळ होता.

लोकसभा निवडणुकीतही झिनियाचा एक्झिट पोल अचूक 

झिनियाने दिलेलाएक्झिट पोल डेटा इतर कोणत्याही एक्झिट पोलच्या तुलनेत सर्वात जवळचा होता. त्यावेळी, एक्झिट पोलमध्ये एनडीएला 305 जागा, इंडिया आघाडीला 180 आणि इतरांना 58 जागा देण्यात आल्या होत्या. वास्तविक निकाल आले तेव्हा एनडीएला 293 जागा मिळाल्या, जे झिनियाच्या विश्लेषणाच्या सर्वात जवळ होत्या. यावरून झिनियाचा एक्झिट पोल सर्वात अचूक असल्याचे सिद्ध झाले.

(DISCLAIMER: दिल्ली विधानसभा निवडणुकीचे निकाल 8 फेब्रुवारी रोजी लागतील. तत्पूर्वी ZEE २४ तास ने आपल्या प्रेक्षकांसाठी AI एक्झिट पोल आणला आहे. या एक्झिट पोलमध्ये आम्ही आर्टिफीशिअल इंटेलिजेन्सचा वापर केलाय. डेटा कलेक्शन आणि डेटा प्रोसेसिंगमध्ये AI तंत्रज्ञानाचा वापर करण्यात आलाय. उल्लेखनीय बाब म्हणजे, झी २४ तास तुम्हाला जे आकडे दाखवत आहे, ते सर्व्हे एजंसीचे आहेत. हे आकडे विधानसभा निवडणुकीचे निकाल नसून केवळ एक्झिट पोलची आकडेवारी आहे. एक्झिट पोलचे आकडे आणि निकाल यात फरक असू शकतो.)