टीम इंडियामध्ये फूट? विराट कोहलीविरोधात वरिष्ठ खेळाडूकडून बीसीसीआयकडे तक्रार!

मुंबई : टीम इंडियाचा कर्णधार विराट कोहलीने अलीकडेच टी -20 चे कर्णधारपद सोडण्याची घोषणा करून सर्वांना आश्चर्यचकित केले आहे. विराट कोहली 2021 च्या टी 20 विश्वचषकानंतर टी 20 कर्णधारपद सोडणार आहे. विराट कोहलीसाठी सध्याचा काळ चांगला नाही. टीम इंडियाच्या एका वरिष्ठ खेळाडूने इंग्लंड दौऱ्यावर कोहलीच्या वर्तनाबाबत बीसीसीआयकडे तक्रार केल्याची बातमी समोर आली आहे.

सूत्रानुसार, काही महिन्यांपूर्वी टीम इंडियामध्ये विराट कोहलीविरोधात बंडखोरी सुरू झाली. अनेक वरिष्ठ खेळाडू विराट कोहलीच्या ड्रेसिंग रूममधील वागण्यामुळे नाराज झाल्याच्या बातम्या देखील समोर आल्या होत्या. त्यानंतर एका वरिष्ठ खेळाडूने कोहलीविरोधात बीसीसीआय सचिवांकडे तक्रार केली होती.

रिपोर्ट्सनुसार, एक वरिष्ठ खेळाडू कोहलीवर नाराज होता. म्हणूनच त्याने कोहलीबद्दल बीसीसीआयकडे तक्रार केली. मात्र, तो खेळाडू कोण होता हे अद्याप स्पष्ट झालेले नाही.

काही वेळापूर्वी बीसीसीआयच्या एका सूत्राने म्हटले होते की, 'कोहली नियंत्रण गमावत आहे. त्याने आदर गमावला आहे आणि काही खेळाडूंना त्याचे वागणे देखील आवडत नाही. तो आता प्रेरणादायी कर्णधार राहिला नाही आणि तो खेळाडूंचा सन्मान मिळवू शकला नाही. त्यांच्याशी व्यवहार करताना तो त्याच्या मर्यादा ओलांडतो.

बीसीसीआयच्या एका सूत्राने म्हटले होते की, 'कोहली मोठी खेळी खेळण्यात अपयशी ठरला आहे. प्रकरण आणखी गुंतागुंतीचे झाले आहे. अलीकडेच एका प्रशिक्षकाने नेटवर त्याला काही सूचना दिल्या पण कोहलीने 'मला गोंधळात टाकू नका' असे उत्तर दिले.

विराटला आता त्याच्या पूर्वीसारख्या फॉर्ममध्येही नाही. यामुळे त्यांच्या खेळावर आणि खेळाडूंवरती प्रभाव थोडा कमी झाला आहे. आता त्याच्या प्रत्येक हालचालींवर प्रश्नचिन्ह निर्माण झाले आहे. तो जागतिक क्रिकेटमधील सर्वोत्तम फलंदाजांपैकी एक आहे यात शंका नाही.

एका माजी खेळाडूने पीटीआयशी संभाषणादरम्यान म्हटले होते, 'विराटची खरी समस्या संवाद आहे. महेंद्रसिंग धोनीच्या बाबतीत, म्हणजे तो जेव्हा कॅप्टन होता, तेव्हा त्याची खोली 24 तास उघडी होती आणि खेळाडू आत जाऊ शकायचा, व्हिडीओ गेम खेळू शकत होता, त्याच्यासोबत अन्न खाऊ शकत होता आणि गरज पडल्यास क्रिकेटबद्दल बोलूही शकत होता.

त्याने पुढे सांगितले, 'मैदानाबाहेर कोहलीशी संपर्क साधणे खूप कठीण आहे'. माजी क्रिकेटपटू म्हणाला, 'रोहितमध्ये धोनीची झलक आहे, पण वेगळ्या पद्धतीने. तो कनिष्ठ खेळाडूंना रात्रीच्या जेवणासाठी घेऊन जातो, ते वाईट काळातून काम करत असताना त्यांना पाठीवर थाप मारतो. ज्यामुळे खेळाडूंच्या मानसिक बाजूची जाणीव होते.

कोहली खेळाडूंना पाठिंबा देत नाही

माजी खेळाडूने पीटीआयशी संभाषणादरम्यान सांगितले की, 'कनिष्ठ खेळाडूंचा प्रश्न आहे, कोहलीविरुद्ध सर्वात मोठी तक्रार ही आहे की तो कठीण काळात त्यांना मधेच सोडतो.

कर्णधारपदाचा कोहलीवर दबाव इतका आहे की, त्याचा त्याच्या खेळावर परिणाम होऊ लागला आहे. आता असे संकेत मिळत आहेत की, त्याला वन डे इंटरनॅशनलमध्येही अशा परिस्थितीला सामोरे जावे लागू शकते आणि तो या फॉरमॅटचे कर्णधारपदही सोडू शकतो. बीसीसीआयच्या एका सूत्राने सांगितले, "विराटला माहिती आहे की, जर संघाने संयुक्त अरब अमिरातीमध्ये होणाऱ्या टी -20 विश्वचषकात चांगली कामगिरी केली नाही तर त्याला मर्यादित षटकांच्या कर्णधारपदावरून वगळले जाऊ शकते. त्यामुळे त्याने कर्णधार पद सोडण्याचा आधीच निर्णय घेतला".