Breaking News LIVE Updates: राज्याचे मुख्यमंत्री कोण होणार यासंदर्भातील संभ्रम कायम असून राजकीय घडामोडींना अगदी गल्लीपासून दिल्लीपर्यंत वेग आल्याचं चित्र पाहायला मिळत आहे. राज्याच्या मुख्यमंत्रीपदाबरोबर मंत्रिमंडळामध्ये कोणाची वर्णी लागणार यासंदर्भात उत्सुकता कायम आहे. राजकीय घडामोडींबरोबरच राज्यातील इतर महत्त्वाच्या घडामोडींचा धावता आढावा या लाइव्ह ब्लॉगच्या माध्यमातून घेता येईल.
26 Nov 2024, 07:18 वाजता
मुंबईतील हवेचा दर्जा पुन्हा खालावला
दिवाळीनंतर पुन्हा एकदा मुंबईतील हवेचा स्तर खालावला आहे. मागील शनिवारपासून मुंबईतील हवेचा गुणवत्ता निर्देशांक 187 ते 194 दरम्यान पोहोचला आहे. त्यामुळे श्वसनविकार असलेल्या नागरिकांनी काळजी घेण्याचे आवाहन करण्यात आले आहे. दिवाळीपासून मुंबईतील हवेच्या गुणवत्तेची पातळी असमाधानकारक स्थितीत आहे. गेल्या काही दिवसांपासून हवेची गुणवत्ता खालावत आहे. वाढत्या प्रदूषणासाठी वाहने, बांधकामे आणि कंपन्याच जबाबदार नाहीत, तर तापमानात घट झाल्यामुळे प्रदूषणाचे कण वातावरणात कायम राहतात. तसेच शहरात धुकेही दिसून येत आहे. केंद्रीय प्रदूषण नियंत्रण मंडळाच्या 'समीर' अॅपनुसार, सोमवारी मुंबईतील हवेची सरासरी गुणवत्ता 190 एक्यूआय नोंदवण्यात आली.
26 Nov 2024, 07:18 वाजता
म्हाडाच्या कोकण मंडळाची सोडत लांबणीवर
म्हाडाच्या कोकण मंडळाने 2264 घरांच्या सोडतीसाठी अर्जविक्री-स्वीकृती प्रक्रिया सुरू केली असून त्याला इच्छुक अर्जदारांकडून अत्यंत कमी प्रतिसाद मिळाला आहे. 11 ऑक्टोबर ते 21 नोव्हेंबर दरम्यान 2264 घरांसाठी अनामत रक्कमेसाठी केवळ 2514 अर्ज दाखल झाले आहेत. अत्यल्प प्रतिसादामुळे कोकण मंडळाची चिंता वाढली असून आता अर्ज विक्री – स्वीकृतीस मुदतवाढ देण्याची नामुष्की मंडळावर आली आहे. त्यानुसार लवकरच मुदतवाढीची अधिकृत घोषणा करण्यात येणार आहे. मुदतवाढ दिल्यास 27 डिसेंबर रोजी काढण्यात येणारी सोडत लांबणीवर पडण्याची चिन्हे आहेत.
26 Nov 2024, 07:15 वाजता
राष्ट्रवादी काँग्रेस पक्षाचे नाव आणि चिन्हाबाबत सुप्रीम कोर्टात आज सुनावणी
राष्ट्रवादी काँग्रेस पक्षाचे नाव आणि चिन्हाबाबत सुप्रीम कोर्टात आज सुनावणी होणार आहे. विधानसभा निवडणुकीनंतर पहिल्यांदाच सुनावणी होणार आहे. राज्यात झालेल्या विधानसभा निवडणुकीनंतर सुप्रीम कोर्ट काय निर्देश देणार याकडे सगळ्यांचे लक्ष लागलं आहे. मागच्या सुनावणीमध्ये शरद पवारांचा फोटो वापरू नका असे स्पष्ट निर्देश कोर्टाने अजित पवार यांच्या पक्षाला दिले होते. ही सुनावणी विधानसभा निवडणुकीच्या पूर्वी झालेली.
26 Nov 2024, 07:15 वाजता
सोन्याचे दर एक हजाराने तर चांदी 1600 रुपयांनी घसरली
कमकुवत जागतिक कलामुळे सोमवारी सोन्याचा भाव प्रति दहा ग्रॅममागे एक हजार रुपयांनी घसरून 80 हजार रुपयांच्या खाली घसरला. नवी दिल्लीत शुद्ध सोन्याचा भाव प्रति दहा ग्रॅमसाठी शुक्रवारच्या 80 हजार 400 रुपयांच्या तुलनेत एक हजार रुपयांनी घसरून 79 हजार 400 रुपयांवर आला. चांदीचा भावही किलोमागे १६०० रुपयांनी घसरून 91 हजार 700 रुपये झाला. शुक्रवारी चांदीचा भाव 93,300 रुपये होता.
26 Nov 2024, 07:11 वाजता
पुण्यातून आता 'या' दोन देशांमध्ये थेट विमानसेवा
पुण्याहून देशांतर्गतसह आंतरराष्ट्रीय विमान उड्डाणांमध्ये आता वाढ झाली आहे. पुण्यातून दुबई आणि बँकॉकसाठी थेट विमानसेवा सुरू झाली आहे. यामुळे पुण्यातून होणाऱ्या आंतरराष्ट्रीय उड्डाणांची संख्या आता चार झाली आहे. पुणे विमानतळाने हिवाळी वेळापत्रकात या नवीन आंतरराष्ट्रीय उड्डाणांचे नियोजन केले होते. इंडिगो एअरलाइन्सने पुण्याहून बँकॉकसाठी थेट विमानसेवा सुरू केली आहे. याचबरोबर इंडिगोनेच पुणे ते दुबई थेट विमानसेवा सुरू केली आहे.
26 Nov 2024, 07:11 वाजता
सोमवारी रात्री फडणवीसांचा दिल्लीत धावता दौरा; रात्रीच मुंबईत परतले
उपमुख्यमंत्री देवेंद्र फडणवीस सोमवारी रात्री दिल्लीत दाखल झाले. मात्र "राज्याच्या राजकारणा संदर्भात दिल्लीत आज कोणतीही बैठक नाही," असं फडणवीसांनी स्पष्ट केलं. फडणवीसांच्या या दौऱ्यानंतर महाराष्ट्राच्या राजकारणातील सस्पेन्स पुन्हा एकदा वाढला आहे. "लोकसभा अध्यक्ष ओम बिर्ला यांच्या घरगुती कार्यक्रमासाठी मी दिल्लीत आलोय आज रात्री माझी कुणाशीही बैठक नाही," असं फडणवीसांनी सांगितलं होतं. देवेंद्र फडणवीस रात्रीच पुन्हा मुंबईला परतले. आज दिल्लीत महायुतीची बैठक होणार की नाही याबाबत कुठलीही स्पष्टता नाही.
26 Nov 2024, 07:08 वाजता
घरबसल्याच मिळवता येणार आवडती नंबर प्लेट
लाखो-करोडो रुपये खर्च करून नवीन वाहन खरेदी केल्यानंतर आता ऑनलाइन पद्धतीने आकर्षक वाहन क्रमांक मिळवण्याची सुविधा आरटीओद्वारे राज्यभरात सुरू केली जाणार आहे. त्यामुळे घरबसल्या पसंतीचा वाहन क्रमांकाची नोंद करता येणार आहे. सप्टेंबर 2024 मध्ये राज्य सरकारने जारी केलेल्या अधिसूचनेनुसार राज्य सरकारने ह्यव्हीआयपीह्ण वाहन क्रमांकांच्या किमतीत वाढ केल्याचे जाहीर केले.
26 Nov 2024, 07:08 वाजता
पुण्याचं तापमान 10.5 अंश सेल्सियसवर
थंडीचा जोर वाढत असल्याने पुणे शहर आणि परिसरात सध्या सुखद गारवा अनुभवायला मिळत आहे. रात्री आणि दिवसाही वातावरण थंड असून, यंदाच्या हंगामातील सर्वांत कमी 10.5 अंश सेल्सियस तापमान एनडीए येथे नोंदवले गेले. येत्या काही दिवसांत थंडीचा जोर आणखी वाढून पारा घसरण्याचा अंदाज आहे. हवेतील आर्द्रता कमी होऊन वातावरण कोरडे होत आहे. त्यामुळे गेल्या काही दिवसांपासून शहरातील तापमानात सातत्याने घट होत आहे. मात्र, बंगालच्या उपसागरात कमी दाबाच्या क्षेत्राची निर्मिती झाली आहे. हे क्षेत्र आंध्र प्रदेश किनारपट्टीच्या जवळून उत्तरेकडे वाटचाल करण्याचा अंदाज आहे. त्यामुळे मध्य भारतासह महाराष्ट्रात आर्द्रता वाढू शकते. तसेच नोव्हेंबरअखेर आणि डिसेंबरच्या पहिल्या आठवड्यापर्यंत उत्तरेकडून येणाऱ्या थंड वाऱ्यांमध्ये वाढ होऊन रात्रीच्या तापमानात घट होऊ शकते.
26 Nov 2024, 07:05 वाजता
26/11 च्या हल्ल्याला 16 वर्ष पूर्ण
मुंबईवर झालेल्या 26/11 च्या दहशतवादी हल्ल्याला आज 16 वर्ष पूर्ण होत आहेत. त्यानिमित्त ठिकठिकाणी शहिदांना आणि या हल्ल्यात बळी पडलेल्या श्रद्धांजली वाहण्याच्या कार्यक्रांचं आयोजन करण्यात आलं आहे.
26 Nov 2024, 07:05 वाजता
ऑक्टोबर महिन्यात जगातील 12 टक्के भूभागावर सरासरीपेक्षा जास्त तापमान
जागतिक पातळीवर गेल्या 175 वर्षांत यंदाचा ऑक्टोबर महिना दुसऱ्या क्रमाकांचा उष्ण महिना ठरला आहे. तर भारत आणि पाकिस्तान आणि दक्षिण अमेरिकेत यंदा ऑक्टोबर महिना आजवरचा सर्वांधिक उष्ण ठरला आहे. ऑक्टोबर महिन्यात जगातील 12 टक्के भूभागावर सरासरीपेक्षा जास्त तापमान होते, असे निरिक्षण अमेरिकेच्या नॅशनल ओशनिकॲण्ड ॲटमॉस्फेरिक ॲडमिनिस्ट्रेशन (नोआ) यांनी दिली आहे.
