అమరావతి: తిరుమల తిరుపతి దేవస్థానం పాలకమండలి సభ్యులుగా నెల్లూరు జిల్లా సూళ్లూరుపేటకు చెందిన టీడీపీ సీనియర్ నేత వేనాటి రామచంద్రా రెడ్డి, కడప జిల్లా రాయచోటికి చెందిన సుగవాసి ప్రసాద్‌బాబులను నియమిస్తూ ఏపీ రాష్ట్ర సర్కార్ ఉత్తర్వులు జారీ చేసింది. ఇటీవలే తెలంగాణలోని ఖమ్మం జిల్లా సత్తుపల్లి ఎమ్మెల్యే సండ్ర వెంకటవీరయ్యకు టీటీడీ బోర్డు సభ్యుడిగా అవకాశం కల్పించినప్పటికీ ఆయన బాధ్యతలు స్వీకరించకపోవడంతో ఆ తర్వాత దేవాదాయ శాఖ ఆ నియామకాన్ని రద్దు చేసింది. మరోవైపు టీటీడీ బోర్డు సభ్యురాలిగా విశాఖ జిల్లా పాయకరావుపేట ఎమ్మెల్యే వంగలపూడి అనితను నియమిస్తూ గతంలో రాష్ట్ర ప్రభుత్వం ఆదేశాలు జారీ చేయగా ఆమె ఆ పదవిని స్వీకరించేందుకు సున్నితంగానే తిరస్కరించారు. అంతేకాకుండా తన నియామకాన్ని రద్దు చేయాల్సిందిగా ఆమె కోరడంతో రాష్ట్ర ప్రభుత్వం ఆ నియామకాన్ని రద్దు చేసిన సంగతి తెలిసిందే.
అలా ఖాళీ అయిన ఆ ఇద్దరు సభ్యుల స్థానాలను వేనాటి రామచంద్రా రెడ్డి, సుగవాసి ప్రసాద్ బాబులతో భర్తీ చేస్తూ రాష్ట్ర ప్రభుత్వం నిర్ణయం తీసుకుంది. ప్రస్తుతం జిల్లా పరిషత్‌లో ఫ్లోర్ లీడర్‌గా వున్న వేనాటి రామచంద్రా రెడ్డికి టీటీడీ బోర్డు మెంబర్ పదవి దక్కడంపై సూళ్లూరుపేట టీడీపీ నేతలు హర్షం వ్యక్తంచేస్తున్నారు.
