1995ൽ പുറത്തിറങ്ങിയ മോഹൻലാൽ ചിത്രമാണ് സ്ഫടികം. വമ്പൻ ഹിറ്റ് ആയിരുന്ന സ്ഫടികം ഇപ്പോൾ പുതിയ സാങ്കേതികതയുടെ എല്ലാ മികവുകളോടെയും വീണ്ടും തിയേറ്ററിലേക്ക് എത്തുകയാണ്. ഭദ്രൻ ആയിരുന്നു സ്ഫടികം സംവിധാനം ചെയ്തത്. സ്ഫടികം ഒരു ട്രെൻഡ് സെറ്റർ തന്നെയായിരുന്നു. മോഹൻലാലിന്റെ കരിയറിലെ ഏറ്റവും മികച്ച കഥാപാത്രങ്ങളിലൊന്നാണ് ആടുതോമ. കൂടാതെ ഈ ചിത്രത്തിലൂടെ നടി സിൽക്ക് സ്മിതയെക്കുറിച്ചുള്ള ആളുകളുടെ ധാരണ മാറ്റാൻ ഒരു പരിധിവരെ സഹായിച്ചു.
ചിത്രത്തിന്റെ 4K റീമാസ്റ്റേർഡ് പതിപ്പ് പുറത്തിറക്കാൻ ഒരുങ്ങുന്നതിന്റെ ഭാഗമായി അടുത്തിടെ നടന്ന ഒരു പത്രസമ്മേളനത്തിൽ ചിത്രത്തിന്റെ ഷൂട്ടിംഗ് സമയത്തുണ്ടായ ഒരു സംഭവത്തെ കുറിച്ച് സംവിധായകൻ വിവരിക്കുകയുണ്ടായി. പള്ളിയിൽ വെച്ച് ഷൂട്ട് ചെയ്യേണ്ട രംഗമുണ്ടായിരുന്നു ചിത്രത്തിൽ. എന്നാൽ പള്ളിയിൽ ചിത്രീകരിക്കുന്നതിന് വൈദികൻ ആദ്യം അനുമതി നിഷേധിച്ചിരുന്നു.
“ഞങ്ങൾ ഒരു രംഗം ഷൂട്ട് ചെയ്യാൻ പള്ളി അന്വേഷിച്ചെത്തിയപ്പോൾ ചിത്രീകരിക്കാൻ കഴിയില്ലെന്ന് അവിടെയുള്ള വൈദികൻ പറഞ്ഞു. സിൽക്ക് സ്മിതയെ പള്ളിയിൽ കയറ്റാൻ പറ്റില്ലെന്ന് പറഞ്ഞതാണ് എന്നെ ഞെട്ടിച്ചത്,” സംവിധായകൻ പറഞ്ഞു. കൂടുതൽ അന്വേഷിച്ചപ്പോൾ, "ചില അശ്ലീല രംഗങ്ങൾ" ടീം ഷൂട്ട് ചെയ്യുന്നതിനാൽ ഇത് പ്രശ്‌നമുണ്ടാക്കും എന്ന് വൈദികൻ പറഞ്ഞു.
"ഞാൻ അദ്ദേഹത്തോട് ചോദിച്ചു, 'നിങ്ങൾക്ക് അത് എങ്ങനെ പറയാൻ കഴിയും?'... ഇത് അങ്ങനെയൊരു സിനിമയല്ലെന്ന് ഞാൻ അദ്ദേഹത്തോട് പറഞ്ഞു, തുടർന്ന് സിനിമയുടെ ഉള്ളടക്കം വിവരിച്ചു. ഉള്ളടക്കം കേട്ട ശേഷം, അദ്ദേഹത്തിന് അത് ഇഷ്ടപ്പെടുകയും ഞങ്ങളെ പള്ളിയിൽ ഷൂട്ട് ചെയ്യാൻ അനുവദിക്കുകയും ചെയ്തു. സിൽക്ക് സ്മിതയെക്കുറിച്ച് ഈ സിനിമയിലൂടെ എനിക്ക് തിരുത്താൻ കഴിയുന്ന ഒരു ഇമേജ് ഉണ്ടായിരുന്നു,” സംവിധായകൻ പറഞ്ഞു. ലൈല എന്ന കഥാപാത്രത്തെയാണ് സിൽക്ക് സ്മിത ചിത്രത്തിൽ അഭിനയിച്ചത്.
തിലകൻ, നെടുമുടി വേണു, കെപിഎസി ലളിത, ഉർവശി, രാജൻ പി ദേവ്, ചിപ്പി, അശോകൻ, മണിയൻപിള്ള രാജു തുടങ്ങി നിരവധി താരങ്ങൾ ചിത്രത്തിൽ അഭിനയിച്ചിട്ടുണ്ട്. സ്ഫടികത്തിന്റെ 4K പതിപ്പ് 2023 ഫെബ്രുവരി 9ന് തിയേറ്ററുകളിൽ എത്തും.
പുതിയ പതിപ്പിനെക്കുറിച്ച് ഭദ്രൻ പറഞ്ഞത് ഇങ്ങനെ, “ഒറിജിനലിൽ അവതരിപ്പിക്കാൻ കഴിയാതിരുന്ന നിരവധി ഷോട്ടുകൾ ഞങ്ങൾ ഇതിൽ ഉൾപ്പെടുത്തിയിട്ടുണ്ട്. പശ്ചാത്തല സംഗീതത്തിന്റെ കാര്യത്തിൽ - ഒറിജിനലിൽ നിന്ന് വ്യത്യസ്തമായ ഒരു ഫീൽ സിനിമയ്ക്ക് ഉണ്ടെന്ന് ഉറപ്പാക്കാനും ഞങ്ങൾ ശ്രമിച്ചിട്ടുണ്ട്. ബിജിഎമ്മിൽ മാറ്റം വരുത്തിയിട്ടില്ല, എന്നാൽ ഒറിജിനൽ കണ്ട ആളുകൾ ശ്രദ്ധിക്കുന്ന ചില മാറ്റങ്ങൾ അതിലുണ്ട്.
4K പതിപ്പിന് ഒടിടി റിലീസ് ലഭിക്കുമെങ്കിലും 2024-ൽ മാത്രമേ ചിത്രം ഡിസ്‌നി ഹോട്ട്‌സ്റ്റാറിലും MX Player-ലും സ്ട്രീം ചെയ്യുകയുള്ളൂവെന്നും സംവിധായകൻ പറഞ്ഞു.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
