Union Budget 2025: வரும் 2025-26 நிதியாண்டுக்கான பட்ஜெட் இன்று தாக்கல் செய்யப்பட்ட நிலையில், ரயில்வே துறை சார்ந்து பட்ஜெட்டில் தெரிவிக்கப்பட்டது என்ன என்பதை இங்கு காணலாம்.
Railway Budget 2025: 1924ஆம் ஆண்டில் முதல் ரயில்வே பட்ஜெட் தாக்கல் செய்யப்பட்டது. 2017இல் ரயில்வே பட்ஜெட் நிறுத்தப்பட்டது. தற்போது ரயில்வே துறைக்கு ரூ.2.52 லட்சம் கோடி நிதி ஒதுக்கீடு செய்யப்பட்டது.
1860ஆம் ஆண்டு முதல்முறையாக இந்தியாவில் பட்ஜெட் தாக்கல் செய்யப்பட்டது. சுதந்திர இந்தியாவில் 1947ஆம் ஆண்டில் முதல் பட்ஜெட் தாக்கல் செய்யப்பட்டது. இந்நிலையில், சுதந்திரத்திற்கு 78வது ஆண்டாக பட்ஜெட் இன்று தாக்கல் செய்யப்பட்டுள்ளது.
அதேபோல், நிதிநிலை பட்ஜெட் உடன் ரயில்வே பட்ஜெட்டும் ஒவ்வொரு ஆண்டும் தாக்கல் செய்யப்பட்டு வந்தது. அதாவது, 1924ஆம் ஆண்டில் இருந்து ரயில்வே பட்ஜெட் (Railway Budget 2025) தனியாக தாக்கல் செய்யப்பட்டு வந்தது.
ஆனால், 2017ஆம் ஆண்டில் ரயில்வே பட்ஜெட் தனியே தாக்கல் செய்யப்பட மாட்டாது என்றும், அதுவும் நிதிநிலை அறிக்கை உடனே தாக்கல் செய்யப்படும் என கூறப்பட்டது. மேலும் கடந்த 8 ஆண்டுகளாக மொத்தமாகவே பட்ஜெட் தாக்கல் செய்யப்படுகிறது.
இந்நிலையில், இன்று 2025-26 நிதியாண்டுக்கான பட்ஜெட் தாக்கல் செய்யப்பட்டது. இந்த பட்ஜெட்டில் ரயில்வே துறை பெரிதும் எதிர்பார்க்கப்பட்டது. வந்தே பாரத், அம்ரித் பாரத் உள்ளிட்ட ரயில் சேவைகள் அதிகப்படுத்தப்படும் என எதிர்பார்க்கப்பட்டது.
அதுமட்டுமின்றி, தமிழ்நாடு போன்ற பெரிய மாநிலங்களுக்கும் பல ரயில்வே திட்டங்கள் கொண்டவரப்படலாம் என எதிர்பார்க்கப்பட்டது. ஆனால், ரயில்வே துறை சார்ந்து இன்றைய பட்ஜெட்டில் எவ்வித அறிவிப்பும் இல்லாதது பெரும் ஏமாற்றத்தை அளித்துள்ளது.
2025-26 நிதியாண்டில் ரயில்வே துறைக்கு மத்திய அரசு ரூ.2.52 லட்சம் கோடி நிதி ஒதுக்கீடு செய்யப்படுகிறது. அதாவது கடந்தாண்டு ஒதுக்கப்பட்ட அதே நிதிதான் இந்தாண்டும் ஒதுக்கப்படுகிறது. அதை கூட்டவோ குறைக்கவோ இல்லை.
இருப்பினும், ரயில்வே துறையின் மொத்த வருவாய் வரும் நிதியாண்டில் அதிகரிக்கும் என எதிர்பார்க்கப்படுகிறது. அதாவது ரயில்வேயின் மொத்த வருவாய் ரூ.3 லட்சம் கோடியை தாண்டும் என எதிர்பார்க்கப்படுகிறது.
உள்நாட்டு பராமரிப்பு, ரயில் பழுதுபார்ப்பு மற்றும் ரயில்வே பொருட்களின் செயல்பாடுகளுக்கு சலுகை வரியுடன் வெளிநாட்டு பொருட்களை காலவரையின்றி இறக்குமதி செய்ய அனுமதி அளிக்கப்படுகிறது எனவும் 2025-26 பட்ஜெட்டில் நிதி அமைச்சர் நிர்மலா சீதாராமன் தெரிவித்துள்ளார்.
