Petrol-Diesel price : आज रात्रीपासून पेट्रोल-डिझेलचे दर वाढण्याची शक्यता

Petrol-Diesel Price Hike : रशिया विरुद्ध युक्रेनमध्ये सुरू असलेल्या युद्धामुळे जगभरात चिंतेचं वातावरण आहे. कारण याचा परिणाम सर्वच देशांना भोगावा लागतो आहे. युद्धाचा आज 12 वा दिवस आहे. पण अजूनही दोन्ही देशांमध्ये कोणतीही सकारात्मक चर्चा झालेली नाही. या युद्धाचा परिणाम जागतिक स्तरावर दिसून येतोय. शेअर बाजारापासून ते सराफा बाजारापर्यंत गुंतवणूकदार धास्तावले आहेत. जागतिक स्तरावर कच्च्या तेलाच्या विक्रमी वाढीमुळे रुपया डॉलरच्या तुलनेत आतापर्यंतच्या नीचांकी पातळीवर पोहोचला आहे. यासोबतच तेलाच्या किमतीतही वाढ होत आहे.

आज रात्रीपासून पेट्रोल-डिझेलचे दर वाढण्याची शक्यता

इंडियन ऑइलचे माजी कार्यकारी प्राध्यापक सुधीर बिश्त म्हणाले की, रशिया जगातील 12% कच्च्या तेलाची निर्यात करतो आणि जगभरात पेट्रोल आयात करणाऱ्या देशांमध्ये भारत तिसऱ्या क्रमांकावर आहे. त्यामुळे भारतात तेलाच्या किमतीत वाढ होणे जवळपास निश्चित आहे. आज रात्रीपासूनच पेट्रोल आणि डिझेलच्या दरात मोठा बदल होण्याची भीती व्यक्त केली जात आहे.

10 ते 16 रुपये प्रति लिटरने भाव वाढण्याची शक्यता

दुसरीकडे, वाढत्या महागाईवर नियंत्रण ठेवण्यासाठी केंद्र सरकार पेट्रोल आणि डिझेलच्या उत्पादन शुल्कात तीन ते चार रुपयांनी कपात करू शकते. पण, राज्य सरकारांनी कर कमी केल्यास त्याची शक्यता कमी आहे. जर पेट्रोल आणि डिझेलचे दर वाढले तर युरोपमध्ये वाईट परिस्थिती निर्माण होईल कारण ते रशियन तेल आणि विशेषतः गॅसवर अवलंबून आहे. त्यानुसार भारतात पेट्रोलची किंमत 10 रुपयांवरून 16 रुपयांपर्यंत वाढू शकते. त्याचबरोबर डिझेलच्या दरात प्रतिलिटर 8 ते 12 रुपयांची वाढ होऊ शकते.

आंतरराष्ट्रीय बाजारात ब्रेंट कच्च्या तेलाची किंमत प्रति बॅरल 139 डॉलरवर पोहोचली आहे. क्रूडसाठी हा जवळपास 14 वर्षांचा उच्चांक आहे. जगभरात कमी झालेला पुरवठा आणि आणखी तुटवडा निर्माण होण्याची भीती यामुळे क्रूडच्या दरात जोरदार उसळी आली आहे. त्यामुळे पुढील 1 महिन्यात कच्च्या तेलाच्या किमती आणखी वाढतील.

120 दिवस दर स्थिर

गेल्या 120 दिवसांपासून देशात पेट्रोल आणि डिझेलच्या दरात कोणतीही वाढ झालेली नाही. तर याच काळात कच्च्या तेलाच्या किमती झपाट्याने वाढल्या असून दोन महिन्यांच्या उच्चांकावर पोहोचल्या आहेत. सोमवारी सुरुवातीच्या व्यवहारात अमेरिकन चलन डॉलरच्या तुलनेत रुपया 76.92 पर्यंत घसरला. यानंतर एक वेळ अशी आली जेव्हा 76.96 रुपयांची नीचांकी पातळी गाठली गेली.