ബിജുമേനോനും വിനീത് ശ്രീനിവാസനും കേന്ദ്ര കഥാപാത്രങ്ങളായി എത്തുന്ന ചിത്രം തങ്കത്തിന്റെ പുതിയ പോസ്റ്റർ പുറത്തുവിട്ടു. ചിത്രം 2023 ൽ തിയേറ്ററുകളിൽ റിലീസ് ചെയ്യുമെന്നാണ് അറിയിച്ചിരിക്കുന്നത്. ഭാവന സ്റ്റുഡിയോസിന്റെ ബാനറിൽ ഒരുഹൃങ്ങുന്ന ചിത്രം 2019 ലാണ് ആദ്യം പ്രഖ്യാപിച്ചത്. എന്നാൽ പിന്നീട് ചിത്രം വൈകുകയായിരുന്നു. ക്രൈം ഡ്രാമ വിഭാഗത്തിൽ എത്തുന്ന ചിത്രമാണ് തങ്കം. ചിത്രം സംവിധാനം ചെയ്യുന്നത് നവാഗതനായ സഹീദ് അറാഫത്ത് ആണ്.
ചിത്രത്തിൻറെ തിരക്കഥ ഒരുക്കിയിരിക്കുന്നത് ശ്യാം പുഷ്‌കരനാണ്. ഗിരീഷ് കുല്‍ക്കര്‍ണി, കൊച്ചു പ്രേമൻ, ഉണ്ണിമായ പ്രസാദ് എന്നിവരും ചിത്രത്തിൽ പ്രധാന കഥാപാത്രങ്ങളായി എത്തുന്നുണ്ട്. ദിലീഷ് പോത്തന്‍, ശ്യാം പുഷ്കരന്‍, ഫഹദ് ഫാസില്‍ എന്നിവര്‍ ചേർന്ന് ആരംഭിച്ച സിനിമ നിർമ്മാണ കമ്പനിയാണ് ഭാവന സ്റ്റുഡിയോസ്. മൂവരും ഒന്നിച്ച മഹേഷിന്റെ പ്രതികാരത്തിലെ സ്റ്റുഡിയോയുടെ പേരാണ് ഇവിടെയും നൽകിയിരിക്കുന്നത്. ഭാവന സ്റ്റുഡിയോസിന്റെ നാലാമത് ചിത്രമാണ് തങ്കം.
2019 ൽ ചിത്രം ആദ്യം പ്രഖ്യാപിച്ചപ്പോൾ ഫഹദ് ഫാസില്‍, ജോജു ജോര്‍ജ്, ദിലീഷ് പോത്തന്‍ എന്നിവരെയായിരുന്നു കേന്ദ്രകഥാപാത്രങ്ങളായി നിശ്ചയിച്ചിരുന്നത്. ഇവരെ ഉൾപ്പെടുത്തി കൊണ്ടുള്ള പോസ്റ്ററും പുറത്തുവിട്ടിരുന്നു. എന്നാൽ പിന്നീട് ഫഹദിനും ജോജുവിനും പകരം ബിജു മേനോനും വിനീത് ശ്രീനിവാസനും എത്താൻ തീരുമാനിക്കുകയായിരുന്നു. വിനീത് ശ്രീനിവാസനെ തന്നെയാണ് ആദ്യം മുതലെ കേന്ദ്ര കഥാപാത്രമായി നിശ്ചയിച്ചിരുന്നതെന്ന റിപ്പോർട്ടുകളുമുണ്ട്.
ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്... മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEE MALAYALAM App ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...
