Petrol Diesel Price Cut : കേന്ദ്രത്തിന് പിന്നാലെ ഇന്ധന വില കുറച്ച് സംസ്ഥാന സർക്കാർ; പെട്രോളിന് 2.41-ും ഡീസലിന് 1.36 രൂപയും കുറച്ചു

തിരുവനന്തപുരം : കേന്ദ്രം ഇന്ധന വിലയിലെ എക്സൈസ് തീരുവ വെട്ടികുറച്ചതിന് പിന്നാലെ സംസ്ഥാന സർക്കാരും പെട്രോളിന്റെയും ഡീസലിന്റെയും നികുതിയിൽ ഇളവ് വരുത്തി. പെട്രോൾ നികുതി 2.41 രൂപയും ഡീസൽ നികുതി 1.36 രൂപയും സംസ്ഥാന സർക്കാർ കുറയ്ക്കുന്നതായി ധനകാര്യ വകുപ്പ് മന്ത്രി കെ.എൻ ബാലഗോപാൽ ഫേസ്ബുക്ക് പോസ്റ്റിലൂടെ അറിയിച്ചു.

കൂടാതെ വിലക്കയറ്റം രൂക്ഷമാകുന്ന സാഹചര്യത്തിൽ ഇന്ധന നികുതി കുറച്ച നടപടി സംസ്ഥാന സർക്കാർ സ്വാഗതം ചെയ്യുന്നുവെന്നും ധനമന്ത്രി കെഎൻ ബാലഗോപാൽ. കേന്ദ്രസർക്കാർ ഭീമമായ തോതിൽ വർദ്ധിപ്പിച്ച പെട്രോൾ/ഡീസൽ നികുതിയിൽ ഭാഗികമായ കുറവ് വരുത്തിയിരിക്കുകയാണെന്നും അദ്ദേഹം പറഞ്ഞു. പെട്രോളിന് 8 രൂപയും, ഡീസലിന് 6 രൂപയുമാണ് കുറച്ചിരിക്കുന്നത്. നാളെ മുതൽ വിലക്കുറവ് നിലവിൽ വരും. വിപണിയിൽ പെട്രോളിന് 9.50 രൂപയും ഡീസലിന് 7 രൂപയും കുറയും. ഇതോടെ സംസ്ഥാനത്ത് 10.41 രൂപയും ഡീസലിന് 7.36 രൂപയുമാണ് ഇളവ് ലഭിക്കുന്നത്.

മന്ത്രി കെഎൻ ബാലഗോപാലിന്റെ ഫേസ്‌ബുക്ക് പോസ്റ്റ് 

കേന്ദ്രസർക്കാർ ഭീമമായ തോതിൽ വർദ്ധിപ്പിച്ച പെട്രോൾ/ഡീസൽ നികുതിയിൽ ഭാഗികമായ കുറവ് വരുത്തിയിരിക്കുകയാണ്. ഇതിനെ സംസ്ഥാനസർക്കാർ സ്വാഗതം ചെയ്യുന്നു. ഇതിന്റെ ഭാഗമായി പെട്രോൾ നികുതി 2.41 രൂപയും ഡീസൽ നികുതി 1.36 രൂപയും സംസ്ഥാന സർക്കാർ കുറയ്ക്കുന്നതാണ്.

രാജ്യത്ത് വിലക്കയറ്റം രൂക്ഷമായ സാഹചര്യത്തിൽ ഇന്ധന നികുതി കുറച്ചതിനോടൊപ്പം കേന്ദ്ര സർക്കാർ പാചക വാതക സിലിണ്ടറിന് സബ്‌സിഡിയും പ്രഖ്യാപിച്ചിട്ടുണ്ട്. 200 രൂപ സബ്‌സിഡിയാണ് പാചക വാതക സിലിണ്ടറിന് പ്രഖ്യാപിച്ചിരിക്കുന്നത്. ഉജ്ജ്വല പദ്ധതിക്ക് കീഴിൽ വരുന്ന 9 കോടി ജനങ്ങൾക്ക് ഈ ആനുകൂല്യം ലഭിക്കും.  ഒരു വര്ഷം 12  സബ്‌സിഡി സിലിണ്ടറുകൾ ഉജ്ജ്വല പദ്ധതി പ്രകാരം ലഭിക്കും.

രാജ്യത്ത് വിലക്കയറ്റം അനിയന്ത്രിതമാകുന്ന സാഹചര്യത്തിലാണ് കേന്ദ്രസർക്കാരിന്റെ ഇടപെടൽ ഉണ്ടായിരിക്കുന്നത്. പണപ്പെരുപ്പത്തെ തുടർന്ന് അരിയടക്കമുള്ള സാധനങ്ങളുടെ വില ഉയർന്നിരുന്നു. ഇതിനെ തുടർന്നാണ് കേന്ദ്രസർക്കാർ പുതിയ നടപടി സ്വീകരിച്ചത്. നിർമ്മാണമേഖലയിലടക്കം വിലക്കയറ്റം തടയാനുള്ള നടപടികൾ സ്വീകരിച്ചിട്ടുണ്ട്. 

കാർഷിക രംഗത്തെ വിലക്കയറ്റം തടയുന്നതിന്റെ ഭാഗമായി വളത്തിന് നൽകുന്ന സബ്‌സിഡി ഉയർത്തിയിട്ടുണ്ട്. ഇതിനായി 1.05 ലക്ഷം കോടി രൂപ മാറ്റി വെച്ചിട്ടുണ്ട്. ഇത് സബ്സിഡിയായി നൽകുന്നതോടെ വളത്തിന്റെ വില കുറയുകയും കർഷകർക്ക് ആശ്വാസമാകുകയും ചെയ്യും. ഇതിനോടൊപ്പം തന്നെ പ്ലാസ്റ്റിക് ഉൽപ്പന്നങ്ങൾക്കായി ഉള്ള അസംസ്കൃത വസ്തുക്കളുടെ ഇറക്കുമതി കസ്റ്റംസ് തീരുവയും കുറയ്ക്കുമെന്ന് കേന്ദ്രമന്ത്രി നിർമ്മല സീതാരാമൻ അറിയിച്ചു.

ഏറ്റവും പുതിയ വാർത്തകൾ ഇനി നിങ്ങളുടെ കൈകളിലേക്ക്...  മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ ഭാഷകളില്‍ വാര്‍ത്തകള്‍ ലഭ്യമാണ്. ZEEHindustanApp ഡൗൺലോഡ് ചെയ്യുന്നതിന് താഴെ കാണുന്ന ലിങ്കിൽ ക്ലിക്കു ചെയ്യൂ...