Two Days Bank Holidays News: బ్యాంకు ఉద్యోగులు ఎప్పటి నుంచో డిమాండ్ చేస్తున్న వారానికి రెండు రోజుల సెలవు దినాల ప్రకటన కోసం మరికొంత కాలం వేచి చూడాల్సిందే. బడ్జెట్‌లో ఆర్థిక శాఖ మంత్రి నిర్మలా సీతారామన్ ఈ విషయంపై ప్రకటన చేస్తారని బ్యాంక్ ఉద్యోగులు అందరూ అనుకోగా.. కేంద్రం ఆ దిశగా ఎలాంటి ప్రకటన చేయలేదు.
ప్రస్తుతం బ్యాంకులకు నెలలో ప్రతి ఆదివారంతోపాటు రెండో, నాలుగో శనివారాలు సెలవు దినాలుగా ఉన్నాయి. అంటే పబ్లిక్ హాలీ డేస్ కాకుండా.. ప్రతి నెల ఆరు రోజులు బ్యాంకులు పనిచేయవు.
అయితే వారంలో ఐదు రోజులు పని దినాలుగా మార్చాలని ఆల్‌ ఇండియా బ్యాంక్ అసోసియేషన్‌ చాలా కాలం నుంచి డిమాండ్ చేస్తోంది.
ఐదు రోజులు పని దినాలు అయితే.. బ్యాంకుల పని వేళలు ప్రతి రోజూ మరో 40 నిమిషాలు పెరుగుతాయి. ఈ విషయంపై నిర్ణయం తీసుకోవాలని కేంద్రానికి ఆల్‌ ఇండియా బ్యాంక్ అసోసియేషన్‌ రిక్వెస్ట్ పంపించింది.
కేంద్రం అనుమతి ఇస్తే.. అనంతరం ఆర్‌బీఐ కూడా ఈ విషయంపై నిర్ణయం తీసుకుంటుంది. బడ్జెట్‌లో కేంద్ర ప్రభుత్వం గ్రీన్ సిగ్నల్ ఇస్తుందని బ్యాంక్ ఉద్యోగులు ఆశలు పెట్టుకోగా.. ఎలాంటి ప్రకటన వెలువడలేదు.
వారానికి రెండు సెలవు దినాలపై కేంద్రం నిర్ణయం తీసుకోకపోవడం బ్యాంక్ ఉద్యోగులు నిరాశకు గురవుతున్నారు. మోదీ సర్కార్ నుంచి ప్రకటన కోసం మరికొంత కాలం వేచిచూడాల్సిందే.
