Atukula Batukamma 2nd Day: బతుకమ్మ సంబరాలు మొదలయ్యాయి. ఈ నేపథ్యంలో చిన్నా పెద్దా అనే తేడా లేకుండా బతుకమ్మ ఆడుకుంటారు. రేపు రెండో రోజు బతుకమ్మ పాడ్యమి ఈరోజు శరన్నవరాత్రులు కూడా ప్రారంభమవుతాయి. ఈ నేపథ్యంలో అటుకుల బతుకమ్మ ప్రాముఖ్యత ఏంటో తెలుసుకుందాం.
తెలంగాణలో అత్యంత వైభవోపేతంగా నిర్వహించుకునే బతుకమ్మ పండుగ ప్రారంభమై నేటికి రెండు రోజులు ఈరోజు నిర్వహించుకున్న బతుకమ్మను అటుకుల బతుకమ్మ అని పిలుస్తారు. మొదటి రోజు ఎంగిలిపూల బతుకమ్మ అంటారు.
ఈ ఏడాది బతుకమ్మ అక్టోబర్‌ 2 నుంచి ప్రారంభమై 10వ తేదీ సద్దుల బతుకమ్మతో ముగుస్తుంది. అంటే దసరాకు రెండు రోజులు ముందు.
ఈ 9 రోజులు 9 రకాల బతుకమ్మను తయారు చేస్తారు. ఊరువాడా బతుకమ్మను తయారు చేసి సంబరాలు జరుపుకొంటారు. రంరంగుల పూలతో బతుకమ్మను పేర్చి ఆనందహోలీలో తేలిపోతారు.
రకరకాల పాటలు పాడుతూ బతుకమ్మను ఆడుకుంటారు. ఈ మధ్యకాలంలో కోలాటాలతో కూడా బతుకమ్మను ఆడుతున్నారు. పట్టణ ప్రాంతాల్లో డీజేలు సైతం ఏర్పాటు చేసుకుని సంబరంగా జరుపుకొంటున్నారు.
అయితే, రెండో రోజు ఆశ్వీయుజ మాసం ప్రారంభమవుతుంది. ఈరోజు అటుకుల బతుకమ్మగా జరుపుకొంటారు. శరన్నవరాత్రులు కూడా ప్రారంభమవుతాయి. నైవేధ్యంగా బెల్లం, చప్పడిపప్పు, అటుకులు సమర్పిస్తారు.
ఉదయాన్నే లేచి రంగురంగుల పూలు కోసుకొస్తారు. సాయంత్రం సమయంలో మహిళలందరూ ఆ పూలను గోపురం మాదిరి పేరుస్తారు. ఈ బతుకమ్మతోపాటు గౌరమ్మను తయారు చేస్తారు. ఆడిపాడిన తర్వాత నీళ్లలో నిమజ్జనం చేస్తారు.
ముఖ్యంగా రెండో రోజు అటుకులను వాయినంగా ఇస్తారు. అందుకే దీన్ని అటుకుల బతుకమ్మ అని పిలుస్తారు. అయితే, 9 వ రోజు నిర్వహించుకునే బతుకమ్మను అత్యంత వైభవంగా నిర్వహిస్తారు. దీన్నే సద్దుల బతుకమ్మ, పెద్ద బతుకమ్మ అని కూడా పిలుస్తారు.
