Kiran Abbavaram Birthday: టాలీవుడ్ యంగ్ హీరో కిరణ్ అబ్బవరం పుట్టినరోజు నేడు. ఎలాంటి సినీ బ్యాగ్రౌండ్ లేకపోయినా ఈ కుర్రాడు తన టాలెంట్‌తో అదరగొడుతున్నాడు. ఎస్ఆర్ కల్యాణ మండపం సినిమాతో ప్రేక్షకులకు బాగా రిజిస్టర్ అయిన కిరణ్ అబ్బవరం ప్రస్తుతం 3 సినిమాల్లో నటిస్తున్నాడు. ఒకటి గీతా ఆర్ట్స్ బ్యానర్‌లో 'వినరో భాగ్యము విష్ణు కథ', మరో రెండు కోడి రామకృష్ణ ఎంటర్టైన్‌మెంట్స్ బ్యానర్‌లో 'నేను మీకు బాగా కావాల్సినవాడిని', మైత్రీ మూవీస్ బ్యానర్‌లో 'మీటర్'. కిరణ్ అబ్బవరం నటిస్తున్న ఈ సినిమాలపై మంచి అంచనాలే ఉన్నాయి.
కిరణ్ అబ్బవరం పుట్టినరోజు సందర్భంగా ఒకరోజు ముందే వినరో భాగ్యము విష్ణు కథ గ్లింప్స్‌ను చిత్ర యూనిట్ విడుదల చేసింది. ఈ గ్లింప్స్ ప్రేక్షకులను విపరీతంగా ఆకట్టుకుంటోంది. విడుదలైన 24 గంటల్లోనే 2 మిలియన్ వ్యూస్‌కి చేరువగా దూసుకెళ్తోంది. ప్రస్తుతం యూట్యూబ్‌లో ఈ గ్లింప్స్ వీడియో ట్రెండింగ్‌లో ఉంది. సినిమా మంచి విజయం సాధించాలని, కిరణ్ అబ్బవరం ఖాతాలో మరో హిట్ పడాలని నెటిజన్లు కోరుకుంటున్నారు.
ఈ సినిమాలో కిరణ్ అబ్బవరం తిరుపతి యువకుడిగా కనిపించనున్నాడు. గ్లింప్స్ బ్యాక్ గ్రౌండ్‌లో వినిపిస్తున్న 'నా పేరు విష్ణు, మా ఊరు తిరుపతి.. మరికొన్ని రోజుల్లో మీరు చూడబోయేదే నా కథ.. ఇప్పుడు నా కథ ఎందుకు చెప్తున్నానో మీకు తెలుసా..!' అనే డైలాగ్ ప్రేక్షకులను ఆకట్టుకుంటోంది. మురళి కిషోర్ దర్శకత్వంలో తెరకెక్కుతున్న ఈ సినిమాలో కిరణ్ అబ్బవరం, కశ్మీర పర్దేశీ జంటగా నటిస్తున్నారు. చైతన్ భరద్వాజ్ సంగీతం అందిస్తుండగా విశ్వాస్ సినిమాటోగ్రఫీ అందిస్తున్నారు. ఈ సినిమా సెప్టెంబర్ 30న విడుదల కానుంది.
