மியூச்சுவல் ஃபண்டுகள் என்னும் பரஸ்பர நிதியம் ஒரு சிறந்த முதலீட்டு விருப்பம் என்பதில் மாற்றுக் கருத்து இல்லை. இதன் மூலம் நல்ல வருமானம் பெறலாம். எனினும், முதல் முறையாக மியூச்சுவல் ஃபண்டுகளில் முதலீடு செய்பவர்கள் என்றால், நீங்கள் சில விஷயங்களைத் கவனத்தில் கொள்ள வேண்டும்.
மியூச்சுவல் ஃபண்டுகளில் முதலீடு செய்யும் போது, எந்த விதத்தில் முதலீடு செய்ய வேண்டும், எப்படி திட்டமிட வேண்டும் என்பதை அறிந்து கொண்டால், நல்ல வருமானம் ஈட்டலாம்.
மியூச்சுவல் ஃபண்ட் என்பது பல முதலீட்டாளர்களிடமிருந்து பணம் திரட்டப்பட்டு வெவ்வேறு பங்குகள், பத்திரங்கள் மற்றும் பிற சொத்துக்களில் முதலீடு செய்யப்படும் திட்டமாகும். இது ஒரு தொழில்முறை நிதி மேலாளரால் நடத்தப்படுகிறது.
நீங்கள் ஈக்விட்டி மியூச்சுவல் ஃபண்டில் முதலீடு செய்தால், உங்கள் பணம் வெவ்வேறு நிறுவனங்களின் பங்குகளில் முதலீடு செய்யப்படும். எனவே, பங்குச் சந்தையுடன் ஒப்பிடுகையில், இதில் ரிஸ்க் குறைவு.
ஒவ்வொரு முதலீட்டுக்கும் ஒரு நோக்கம் இருக்க வேண்டும். குழந்தைகளுக்கான கல்விச் செலவு, திருமண செலவு, ஓய்வு கால திட்டமிடல் என பல காரணங்கள் இருக்கலாம். அந்த வகையில், நீண்ட கால முதலீடு செய்ய விரும்பினால், ஈக்விட்டி ஃபண்டுகளில் முதலீடு செய்யுங்கள். குறுகிய காலத்திற்கு பாதுகாப்பான முதலீட்டு விருப்பத்தை தேர்வு செய்யவும். இதற்கு கடன் நிதியை தேர்வு செய்வது நல்லது. நடுத்தர கால முதலீடு மற்றும் மிதமான ரிஸ்க்கிற்கு சமச்சீர் நிதியை தேர்வு செய்யலாம்.
முதலீட்டாளரின் நிதி நிலை மற்றும் பொறுப்புகளின் அடிபப்டையில் ரிஸ்க் எடுக்கும் திறன் வேறுபட்டதாக இருக்கும். இளம் வயதில் முதலீடு செய்யத் தொடங்கும் போது, அதிக ரிஸ்க் எடுக்க முடியும் என்றால், ஈக்விட்டி ஃபண்டுகளைத் தேர்ந்தெடுக்கலாம். நீங்கள் ஓய்வு பெற்றவர் என்றாலோ, அல்லது ஸ்திரத்தன்மையை விரும்புபவர் என்றாலோ, நிதி ஆலோசகரின் உதவியைப் பெறுவது நல்லது.
மியூச்சுவல் ஃபண்டுகளில் முதலீடு செய்வதற்கு டீமேட் கணக்கு தேவை. உங்கள் முதலீடுகள் மின்னணு முறையில் சேமிக்கப்படும். டிமேட் கணக்கைத் திறக்கும்போது, கட்டணம் மற்றும் வருடாந்திர பராமரிப்புக் கட்டணங்கள் என்ன என்பதைச் சரிபார்க்கவும். இது முதலீடுகளைக் கண்காணிக்க அனுமதிக்கிறதா என்பதையும் உறுதி செய்து கொள்ளவும்.
முதலீடு செய்வதற்கு முன் மியூச்சுவல் ஃபண்டுகளின் கடந்தகால செயல்திறனைச் சரிபார்க்கவும். கடந்த 3-5 ஆண்டுகளில் இந்த நிதி நிலையான வருமானத்தை அளித்துள்ளதா? அங்கு நிதி மேலாளரின் தகுதி என்ன? செலவு விகிதம் (கட்டணம்) குறைவாக உள்ளதா அல்லது அதிகமாக உள்ளதா? இந்த விஷயங்கள் அனைத்தையும் கருத்தில் கொள்ளுங்கள். இது தவிர, நல்ல செயல்திறன் கொண்ட நிதிகளை மட்டும் தேர்வு செய்யவும்.
எல்லாப் பணத்தையும் ஒரே ஃபண்டில் முதலீடு செய்யாமல், வெவ்வேறு ஃபண்டுகளில் முதலீடு செய்யுங்கள். சிறந்த வருமானம் பெற உங்கள் போர்ட்ஃபோலியோவில் ஈக்விட்டி ஃபண்டுகள், ஸ்திரத்தன்மைக்கான கடன் நிதிகள் மற்றும் குறிப்பிட்ட துறையில் முதலீடு செய்ய துறை சார்ந்த நிதிகளைச் சேர்க்கவும். சந்தை ஏற்ற இறக்கத்திலிருந்து உங்களைப் பாதுகாத்துக் கொள்ள இந்த முறை உங்களுக்கு உதவும்.
மியூச்சுவல் ஃபண்டுகள் நீண்ட கால முதலீடுகளுக்கானவை. சந்தையில் ஏற்படும் ஏற்ற இறக்கங்களைக் கண்டு பதற்றப்பட்டு எந்த முடிவையும் எடுக்காதீர்கள். உதாரணமாக, பல முறை சந்தை வீழ்ச்சியடையும் போது, பல முதலீட்டாளர்கள் பதற்றமடைந்து பணத்தை திரும்பப் பெறுகிறார்கள், இதனால் அவர்கள் நஷ்டத்தை சந்திக்கின்றனர்.
முறையான முதலீட்டுத் திட்டம் (SIP) என்பது பரஸ்பர நிதிகளில் முதலீடு செய்வதற்கான சிறந்த வழியாகும், அங்கு நீங்கள் ஒவ்வொரு மாதமும் ஒரு நிலையான தொகையை முதலீடு செய்யலாம். இது சந்தை ஏற்ற இறக்கங்களினால் ஏற்படும் பாதிப்பை குறைக்கிறது. இது தவிர, வெறும் 500 ரூபாயில் கூட முதலீடு செய்ய ஆரம்பிக்கலாம்.
