शिवसेना नेता गेल्या 7 दिवसांपासून बेपत्ता, अशोक धोडींचं नेमकं काय झालंय?

पालघरमध्ये शिवसेना नेते अशोक धोडी बेपत्ता आहेत. गेल्या 7 दिवससांपासून त्यांचा पत्ता लागत नाही आहे. त्यामुळे त्यांचं अपहरण झाल्याचा आरोप कुटुंबियांनी केला आहे. अशोक धोडींसोबत नेमकं काय झालं आणि कुणी त्यांचं  अपहरण केलं पाहुयात या रिपोर्टमधून.. 

पालघरमध्ये शिवसेना नेत्याचं अपहरण?

अशोक धोडी 7 दिवसांपासून बेपत्ता?

अशोक धोडींचं झालं काय?

एकीकडे बीड जिल्ह्यातील संतोष देशमुख हत्या आणि अपरहणाचं प्रकरण देशभरात गाजत असताना दुसरीकडे पालघरमधून शिवसेनेचे नेते बेपत्ता झाल्यानं खळबळ उडाली आहे. फोटोत दिसत असलेले शिवसेनेचे डहाणू विधानसभा समन्वयक अशोक धोडी गेल्या 7 दिवसांपासून बेपत्ता आहेत. 20 जानेवारीपासून धोंडी यांचा पत्ता लागत नाही आहे. 20 जानेवारीला संध्याकाळी त्यांची लाल रंगाची ब्रिझा कार गुजरातच्या दिशेनं गेली असल्याचा सीसीटीव्ही समोर आलं आहे... त्यामुळे अशोक धोंडी बेपत्ता झाले नसून त्यांचं अपहरण झाल्याचा आऱोप आता कुटुंबियांनी केला आहे. तसेच संशयित आरोपींची नावंही कुटुंबियांनी पोलिसांना दिली आहे. आता पोलिसांकडून संशयित आरोपींची चौकशी करण्यात येत आहे. 

अशोक धोडींच्या शोधासाठी पोलिसांनी काही पथकं स्थापन केली आहेत. परिसरातील सीसीटीव्हीच्या माध्यमातून त्यांचा शोध घेण्यात येत आहे. पोलिसांनी डहाणू आणि तलासरी तालुक्यातील वाई बोरीगाव परिसरातील सीसीटीव्ही तपासासाठी ताब्यात घेतले आहेत. 

अशोक धोडी यांच्या तपासासाठी पोलिसांनी वेगवान हालचाली कऱण्याची गरज असल्याची मागणी आता स्थानिक शिवसेनेकडून करण्यात आली आहे. अशोक धोडींच्या अपहरणानंतर आता अनेक प्रश्न उपस्थित झालेत. त्यांचं अपहरण कुणी आणि का केलं?  त्यांच्या अपहरणानंतर तलासरी तालुक्यातील वेवजी गावात भीतीचं वातारवण आहे. त्यामुळे पोलिसांनी त्यांचा तातडीनं शोध घेण्याची गरज आहे.