Privatization:'या' सरकारी कंपनीची विक्री, आता रतन टाटा यांच्या हातात कमान

Privatization News: सरकारने आणखी एक मोठी कंपनी खासगी हातात सोपवली आहे. ही सरकारी कंपनी दिग्गज उद्योगपती रतन टाटा यांनी विकत घेतली आहे. वास्तविक ही कंपनी तोट्यात चालली होती आणि हा प्लांट 30 मार्च 2020 पासून बंद आहे. ओडिशा स्थित नीलाचल इस्पात निगम लिमिटेड (NINL) टाटा समूहाच्या एका फर्मकडे सोपवली जात आहे. त्याची संपूर्ण प्रक्रिया जुलैच्या मध्यापर्यंत पूर्ण होण्याची शक्यता आहे. टाटा स्टील लाँग प्रॉडक्ट्स (TSLP), टाटा स्टीलच्या युनिटने या वर्षी जानेवारीमध्ये NINL मधील 12,100 कोटी रुपयांच्या एंटरप्राइझ मूल्याने 93.71 टक्के भागभांडवल विकत घेण्याची बोली जिंकली होती, असे एका अधिकाऱ्याने सांगितले. जिंदाल स्टील अँड पॉवर लिमिटेड, नलवा स्टील अँड पॉवर लिमिटेड आणि जेएसडब्ल्यू स्टील लिमिटेड यांना मागे टाकत कंपनीने हे यश मिळवले होते. 

प्रक्रिया अंतिम टप्प्यात आहे

एका अधिकाऱ्याने पीटीआय या वृत्तसंस्थेला सांगितले की, "व्यवहार अंतिम टप्प्यात आहे आणि पुढील महिन्याच्या मध्यापर्यंत हस्तांतरण होईल, अशी शक्यता आहे." कंपनीमध्ये सरकारची कोणतीही भागीदारी नसल्यामुळे, विक्रीची रक्कम सरकारी तिजोरीत जमा होणार नाही. ही रक्कम ओडिशा सरकारच्या चार CPSE आणि दोन PSU कडे जाईल.

कर्जबाजारी कंपनी

नीलाचल इस्पात निगम लिमिटेडचा कलिंगनगर, ओडिशा येथे 1.1 मेट्रिक टन क्षमतेचा एकात्मिक स्टील प्लांट आहे. ही सरकारी कंपनीही तोट्यात असून 30 मार्च 2020 पासून हा प्लांट बंद आहे. 31 मार्च 2021 पर्यंत कंपनीवर 6,600 कोटी रुपयांची कर्जे आणि दायित्वे आहेत, ज्यात प्रवर्तकांचे 4,116 कोटी रुपये, बँकांचे 1,741 कोटी रुपये, इतर कर्जदार आणि कर्मचाऱ्यांची मोठी देणी आहेत.