सलमानच्या 'या' ब्लॉकबस्टर चित्रपटातून माधुरीला मिळालेला डच्चू; चित्रपटाने केलेली 82 कोटींची कमाई

Madhuri Dixit was Rejected Salman Khan Film: बॉलिवूडमध्ये वेगवेगळा काळ गाजवणाऱ्या अनेक दिग्गज कलाकारांनी बरेच हीट चित्रपट दिले आहेत. या चित्रपटांतील जोड्या नेहमी प्रेक्षकांच्या पसंतीस उतरताना दिसतात. हिंदी चित्रपटसृष्टीत अशा बऱ्याच जोड्या आहेत ज्यांनी हीट चित्रपटांमध्ये काम करुन चाहत्यांच्या मनात विशेष स्थान निर्माण केले. जुन्या काळातील अशा काही जोड्या प्रसिद्ध आहेत ज्यांचे चित्रपट आजही प्रेक्षक आवडीने पाहतात. अशीच एक जोडी म्हणजे सलमान खान आणि माधुरी दीक्षित! ही जोडी बॉलिवूडमधील अनेक चित्रपटांमुळे विशेष लोकप्रिय ठरली. 

सलमान खान आणि माधुरी दीक्षित यांची जोडी  'साजन, 'दिल तेरा आशिक', 'हम आपके हैं कौन' आणि 'हम तुम्हारे हैं सनम' अशा चित्रपटांमध्ये झळकली आहे. त्यांचे बरेच चित्रपट हे बॉक्स ऑफिसवर हीट ठरले. परंतु, या व्यतिरिक्त सलमानचा असा एक चित्रपट होता ज्यामधून माधुरीला रिजेक्ट केले गेले. 1999 मध्ये प्रदर्शित झालेला 'हम साथ साथ हैं' हाच तो चित्रपट.

सुरज बडजात्या यांचा 'हम साथ साथ हैं' हा चित्रपट आजही तितकाच लोकप्रिय आहे. या चित्रपटात सलमान खान, सोनाली बेंद्रे, सैफ अली खान, करिश्मा कपूर, मोहनीश बहल आणि तब्बू अशा कलाकारांनी काम केले आहे. नुकत्याच झालेल्या एका मुलाखतीत सुरज यांनी या चित्रपटासंबंधी काही गोष्टींचा खुलासा केला. 'माधुरी दीक्षितने चित्रपटात काम करण्याची इच्छा व्यक्त केलेली. सलमानच्या वहिनीची भूमिका साकारण्यासाठी ती तयार होती', असं सूरज यांनी मुलाखतीत सांगितलं. परंतु, माधुरीच्या भूमिकेसाठी निर्मांत्यांनी नापसंती दर्शवली. 

चित्रपटात सलमानच्या वहिनीची भूमिका

याआधी 'हम आपके हैं कौन' हा सलमान आणि माधुरीचा रोमँटीक चित्रपट प्रदर्शित झाला होता. त्यानंतरचा सूरज यांचा 'हम साथ साथ हैं' हा चित्रपट मेल डॉमिनेटेड चित्रपट असल्याचं सूरज यांनी सांगितलं. त्यावेळी ते माधुरीला म्हणाले, "या चित्रपटात जर मी तुला सलमानसोबत कास्ट केले तर तुझी भूमिका खूपच छोटी असेल. पण जर मी तुला मोहनीश बहलसोबत कास्ट केले तर तू सलमान खानच्या वहिनीची भूमिका साकारशील, जी खूप चांगली आहे." यावर माधुरीला काहीच अडचण नव्हती. ती ही भूमिका साकारण्यास तयार होती. परंतु, माधुरीने वहिनीची भूमिका साकारणं हे सूरज यांना पटत नसल्याचं त्यांच्या मुलाखतीवरुन स्पष्ट झालं. 

हे ही वाचा: शाहरुख खानची लेक क्रिकेटर रिंकू सिंहबरोबर फिरायला गेली? समुद्रकिनाऱ्यावरील फोटोंमागचं सत्य काय?

सलमानने केले सूरज बडजात्यांसोबत काम

'हम आपके हैं कौन' या चित्रपटाला मोठं यश मिळाल्यामुळे सलमान आणि माधुरीची जोडी अतिशय लोकप्रिय झाली. सूरज यांना 'हम साथ साथ हैं' या चित्रपटात अशी अभिनेत्री हवी होती, जिने याआधी सलमानसोबत मुख्य भूमिकेत काम केलं नसेल. त्यामुळे त्यांनी या चित्रपटातील वहिनीच्या भूमिकेसाठी तब्बूची निवड केली. त्यावेळी तब्बूची चित्रपटसृष्टीत अभिनेत्री म्हणून खास ओळख नव्हती. त्यामुळे चित्रपटातील या भूमिकेसाठी सूरज यांनी तब्बूला कास्ट केले. सलमान खानने 'हम आपके हैं कौन' आणि 'हम साथ साथ हैं' अशा बऱ्याच हीट चित्रपटांमध्ये काम केलं आहे.