രഞ്ജൻ പ്രമോദ് സംവിധാനം ചെയ്ത 'ഒ.ബേബി' എന്ന ചിത്രം ഗംഭീര പ്രതികരണം നേടി തിയേറ്ററുകളിൽപ്രദർശനം തുടരുകയാണ്. പ്രണയപ്പക പ്രമേയമാക്കിയുള്ള നിരവധി ചിത്രങ്ങൾ ഇറങ്ങിയിട്ടുണ്ടെങ്കിലും അവയിൽ നിന്നും വ്യത്യസ്തമായൊരു പ്രമേയവുമായി ഒ ബേബി എത്തിയിരിക്കുന്നത്.
ദിലീഷ് പോത്തനാണ് ടൈറ്റിൽ കഥാപാത്രമായി എത്തിയിരിക്കുന്നത്. ചിത്രത്തിന്റെ ലൊക്കേഷനിൽ നിന്നുള്ള ചില ചിത്രങ്ങൾ പങ്കുവെച്ചിരിക്കുകയാണ് ദിലീഷ് പോത്തൻ.
'രക്ഷാധികാരി ബൈജു'വിന് ശേഷം രഞ്ജൻ പ്രമോദ് ഒരുക്കുന്ന സിനിമയാണ് ഒ ബേബി. മിനി, ബേബി, ബേബിയുടെ മകൻ ബേസിൽ എന്നിവരാണ് ചിത്രത്തിലെ പ്രധാന കഥാപാത്രങ്ങൾ.
മലയോര മേഖലയിലെ പ്രമാണിയുടെ ചെറുമകളെ കാര്യസ്ഥന്റെ മകൻ പ്രണയിക്കുകയും തുടർന്നുണ്ടാകുന്ന സംഭവങ്ങളുമാണ് ചിത്രം പറയുന്നത്. രഘുനാഥ്‌ പലേരി, ഹാനിയ നസീഫ, സജി സോമൻ, ഷിനു ശ്യാമളൻ, അതുല്യ ഗോപാലകൃഷ്‍ണൻ, വിഷ്‍ണു അഗസ്ത്യ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്.
ആദ്യം മുതൽ അവസാനം വരെ ത്രില്ലർ മൂഡിൽ തന്നെയാണ് രഞ്ജൻ പ്രമോദ് ഈ സിനിമ കൊണ്ടുപോയിരിക്കുന്നത്. ഇനി എന്ത് സംഭവിക്കും എന്ന ചിന്ത പ്രേക്ഷകരിൽ ഉണർത്തിക്കൊണ്ടിരിക്കുന്നതായിരുന്നു ഓരോ രംഗങ്ങളും.
തിരക്കഥ തന്നെയാണ് സിനിമയുടെ നട്ടെല്ല്. നിരവധി പുതുമുഖങ്ങളെ ചിത്രത്തിൽ അവതരിപ്പിച്ചിട്ടുണ്ട്. ഛായാഗ്രഹകൻ അരുൺ ചാൽ. ദിലീഷ് പോത്തൻ തന്നെയാണ് നിർമ്മാതാവ്. ലിജിൻ ബാംബിനോയാണ് ചിത്രത്തിന്റെ പശ്ചാത്തല സംഗീതം ഒരുക്കിയത്. സംഗീതം നൽകിയിരിക്കുന്നത് വരുൺ കൃഷ്‍ണയും പ്രണവ് ദാസും ചേർന്നാണ്.
