આણંદમાં અમેરિકાની ક્રિકેટ ટીમે પરસેવો પાડ્યો! મૂળ ગુજરાતી છે USA ક્રિકેટ ટીમનો કેપ્ટન મોનાંક પટેલ

બુરહાન પઠાણ/આણંદ: અમેરીકાની ઈન્ટરનેશનલ ક્રિકેટ ટીમ અત્યારે આણંદ ખાતે ક્રિકેટની પ્રેકટીસ કરી રહી છે, ત્યારે આજે તેઓએ આણંદનાં લાલબહાદુર શાસ્ત્રી સ્ટેડીયમ ખાતે આણંદ જિલ્લા ક્રિકેટ એસોસીએશનની ટીમ સાથે પ્રેકટીસ મેચ રમી હતી. અમેરિકાની ઈન્ટરનેશનલ ક્રિકેટ ટીમનાં કેપ્ટન મોનાંક પટેલ મૂળ આણંદનાં છે. 

આગામી દિવસોમાં અમેરિકાની ક્રિકેટ ટીમ ઓમાનનાં પ્રવાસે જનારી છે અને ત્યાં તેઓ ઓમાનની ટીમ સાથે ક્રિકેટ મેચો રમશે. જેની તૈયારીનાં ભાગરૂપે મેચની પ્રેકટીસ કરવા માટે મોનાંક પટેલ પોતાની હોમપીચ આણંદ પર પસંદગી ઉતારી છે અને છેલ્લા દસ દિવસથી તેઓ આણંદની એક ક્રિકેટ એકેડમીનાં ગ્રાઉન્ડ પર ક્રિકેટ મેચની પ્રેકટીસ કરી રહ્યા છે.

અમેરીકામાં હાલ સ્નોફોલ અને ઠંડી હોવાનાં કારણે ક્રિકે્ટ મેચની પ્રેકટીસ ઈન્ડોર હોલમાં કરવી પડે છે, ત્યારે ઓમાનનાં પ્રવાસે જતા પહેલા અમેરિકાની ક્રિકેટ ટીમને સારા વાતાવરણમાં પ્રેકટીસ મળે તે માટે મોનાંક પટેલે અમેરિકા ક્રિકેટ બોર્ડમાં ભારતનાં આણંદ ખાતે ક્રિકેટ મેચની પ્રેકટીસ કરવા માટે દરખાસ્ત મુકી હતી. બોર્ડ એ તે મંજુર કરતા હાલમાં મોનાંક પટેલનાં નેતૃત્વમાં 11 ખેલાડીઓ અને ડોકટર સાથેની ટીમ આણંદ આવી છે અને એક ખાનગી એકેડમીનાં મેદાન ખાતે તેઓ ક્રિકેટની પ્રેકટીસ કરી રહ્યા છે. તેમજ આજે લાલબહાદુર શાસ્ત્રી સ્ટેડીમ ખાતે પણ પ્રેકટીસ ક્રિકેટ મેચ રમ્યા છે અને ખુબજ મજા આવી છે. 

મોનાંક પટેલનું કહેવું છે કે આણંદ તેનું હોમગ્રાઉન્ડ છે,અને તે અનેક વાર અહિયાં ક્રિકેટ રમી ચુકયો છે. અહીયાનું વાતાવરણ તેમજ સુવિધાઓ ખુબજ સારી છે, જેથી તેણે આણંદ ખાતે પોતાની ટીમને પ્રેકટીસ મળે તે માટે પસંદગી ઉતારી હતી અને અહીંયા સારી પ્રેકટીસ થતા તેઓની ટીમ પણ ખુશ છે. તેમણે કહ્યું હતું કે અહિયાંથી તેઓ ઓમાન જશે અને બાકીનાં જે ખેલાડીઓ છે, જે સીધા ઓમાન પહોંચશે અને જયાં તે્ઓ ક્રિકેટ મેચમાં જોડાશે.