અચાનક બદલાઈ હવામાનની પેટર્ન : આજથી આ જિલ્લામાં આવશે વરસાદ, અંબાલાલની આગાહી સાચી પડી

હવામાન વિભાગની આગાહી વચ્ચે સાબરકાંઠામાં કમોસમી વરસાદી ઝાપટું આવ્યું. લગ્ન સીઝનમાં કમોસમી વરસાદી ઝાપટું વિધ્ન બન્યું છે. ગાંભોઈ પંથકની આજુ બાજુમાં કમોસમી વરસાદ જોવા મળ્યો. ગાંભોઈમાં વરસાદી ઝાપટા બાદ વીજળી ગુલ થતા અંધારપટ પણ છવાયો છે. વરસાદી ઝાપટાને લઈને ખેડૂતો ચિંતિત થયા છે. 

અંબાલાલ પટેલે જે રીતે કમોસમી વરસાદ અને માવઠા ની આગાહી કરી છે તે જોતા અંબાજી દાંતા પંથકમાં ગઈકાલથી વાતાવરણમાં પલટો જોવા મળી રહ્યો છે. આકાશમાં કાળા ડિબાંગ વાદળો જોવા મળી રહ્યો છે. જે જોતા ગમે ત્યારે વરસાદી માવઠું કે કરા પડે તેવી સંભાવનાઓ સેવાઈ રહી છે. હાલ અંબાજી દાંત પંથકમાં મહત્તમ રાયડો અને ઘઉંનું વાવેતર મોટી માત્રામાં થયેલું છે. એટલું જ નહિ, ઘઉંની ઉંબીઓ પણ પૂર્ણતાની આરે પહોંચી છે. તો રાયડો પણ લચવા લાગ્યો છે ત્યારે આકાશમાં ઘેરાયેલા વાદળો જોઈ ખેડૂતોની ચિંતામાં વધારો કર્યો છે. જોકે ખેડૂતોના મતે, વરસાદી ઝાપટાના કારણે રાયડાનો પાક પણ આડો પડી ગયેલો જોવા મળી રહ્યો છે. જો હવે વધુ વરસાદી માવઠું કે કરાનો વરસાદ પડે તો ખેતરોમાં લચી રહેલા રાયડાને ઘઉંના પાકને મોટી નુકશાની થઇ શકે છે. આ ડર ખેડૂતોને સતાવી રહ્યો છે. થોડા દિવસોમાં તૈયાર થયેલો પાક લેવાનો સમય આવે તે પહેલા મોઢે આવેલો કોળિયો છીનવાઈ જાય તેવી ખેડૂતો ભીતિ વ્યક્ત કરી રહ્યા છે ને વરસાદી માવઠું ન પડે તે માટે ભગવાનને પ્રાર્થના કરી રહ્યાં છે.

હવામાન વિભાગના ડાયરેક્ટર એકે દાસે નવી આગાહી કરતા જણાવ્યું કે, ફેબ્રુઆરી માસમાં પણ કમોસમી વરસાદની શક્યતા છે. આગામી સાત દિવસ વાતાવરણ શુષ્ક રહેશે. હાલ સાયક્લોનિક સર્કયુલેશન સિસ્ટમને લઈને અમદાવાદમાં વાદળછાયું વાતાવરણ છવાયું છે. અમદાવાદ લઘુત્તમ 17 ડિગ્રી તાપમાન નોંધાયું છે. તો આજથી વાતાવરણમાં 2-4 ડિગ્રી ઘટશે. ફેબ્રુઆરી મહિનામાં લધુત્તમ મહત્તમ તાપમાન સામાન્ય કરતાં વધારે રહેશે. ફેબ્રુઆરી મહિનામાં સૌરાષ્ટ્ર અને કચ્છમાં કેટલાક જિલ્લામાં છુટા છવાયા હળવા વરસાદની આગાહી છે. 

અંબાલાલ પટેલે કહ્યું કે, 3 ફેબ્રુઆરીમાં ઉત્તર ભારતમાં કમોસમી હિમ વર્ષાની શક્યતા છે. રાજ્યમાં 3 ફેબ્રુઆરી સુધી ઠંડી રહેવાની શક્યતા છે. 3 થી 4 ફેબ્રુઆરીમાં ગુજરાતના ઉત્તર-પૂર્વીય ભાગોમાં વાદળો આવવાની શક્યતા દેખાઈ રહી છે. તો આ સમયે ગુજરાતનાં ઉત્તર પૂર્વીયભાગો છાંટા પડવાની આશંકા છે. દક્ષિણ સૌરાષ્ટ્ર અને દક્ષિણ ગુજરાતમાં વાદળવાયુ રહી શકે છે. 5 થી 7 ફેબ્રુઆરીમાં રાજ્યમાં ઠંડી રહી શકે છે. આ સમયે ઉત્તર ગુજરાતમાં લઘુત્તમ તાપમાન 12 ડિગ્રીથી નીચે જવાની શક્યતા છે. અમદાવાદ અને ગાંધીનગરમાં પણ તાપમાન 13 ડિગ્રી આસપાસ રહેવાની શક્યતા છે.   

બદલાતા વાતાવરણની સાથે અંબાલાલ પટેલે ગુજરાતના નાગરિકોને ચેતવણી પણ આપી છે. તેમણે કહ્યું કે, આ દિવસોમાં સવારે હિમાયળું હવામાન રહેશે. 9 થી 11 ફેબ્રુઆરીમાં ફરી હવામાન પલટાય તેવી શક્યતા છે. 11 અને 12 ફરી ઉત્તર ભારતમાં હિમવર્ષા રહેતા સવારે ઠંડી રહેશે. તો 19 ફેબ્રુઆરીથી ગરમીની શક્યતા દેખાઈ રહી છે. 19 ફેબ્રુઆરીથી 14 એપ્રિલ સુધી રોગીસ્ટ હવામાન રહેશે, જેથી લોકોએ સાવચેતી રાખવી જરૂરી છે. 23 થી ફેબ્રુઆરીના અંત સુધીમાં વાદળવાયુ અને કમોસમી વરસાદના એંધાણ છે.