લો બોલો, ચીની જાસૂસ સમજીને પોલીસે કબૂતરને 8 મહિના કસ્ટડીમાં પુરી રાખ્યું!

Chinese Spy Pigeon: ગયા વર્ષે મે મહિનામાં મુંબઈના ચેમ્બુર વિસ્તારમાંથી એક કબૂતર પકડાયું હતું. તેના પગમાં લાગેલી વીંટી પર કંઈક લખેલું હતું, જેને RCF પોલીસ સ્ટેશનના પોલીસકર્મીઓ ચાઈનીઝ ભાષામાં માનતા હતા. કબૂતરને 'ચીની જાસૂસ' હોવાની શંકાના આધારે કેદ કરવામાં આવ્યું હતું. તેના પગમાં તાંબા અને એલ્યુમિનિયમની બે વીંટીઓ જોડાયેલી હતી. કથિત રીતે તેના પર ચાઈનીઝ સ્ટાઈલમાં મેસેજ લખવામાં આવ્યા હતા. મુંબઈ પોલીસે કબૂતરને 'કેસ પ્રોપર્ટી' તરીકે બાઈ સાકર બાઈ દિનશા પેટિટ હૉસ્પિટલ ફોર એનિમલ્સ મોકલ્યું હતું. 

મેડિકલ ચેકઅપ બાદ કબૂતરને અલગ પાંજરામાં મુકવામાં આવ્યું હતું. તપાસ દરમિયાન, પોલીસને જાણવા મળ્યું કે તે એક રેસિંગ કબૂતર હતું જે કદાચ તાઈવાનથી રસ્તો ગુમાવીને મુંબઈ આવી ગયું હતું. પોલીસે કેસ બંધ કરી દીધો પરંતુ કબૂતરને કેવી રીતે મુક્ત કરવું તે યાદ નહોતું.આખરે પીપલ ફોર ધ એથિકલ ટ્રીટમેન્ટ ઓફ એનિમલ્સ (પેટા) ઈન્ડિયાના હસ્તક્ષેપ બાદ કબૂતરને મુક્ત કરવામાં આવ્યું.

PETA કાર્યકર સલોની સાકરિયાને 'જાસૂસી'ની શંકામાં બંધ કરાયેલા કબૂતરની વાર્તા મળી. તેણે આરસીએફ પોલીસ સ્ટેશનનો સંપર્ક કર્યો અને કબૂતરને તાત્કાલિક છોડવાની પરવાનગી માંગી. થોડી સમજાવટ બાદ પોલીસે એનઓસી આપી હતી. બુધવારે, એનિમલ હોસ્પિટલના મુખ્ય તબીબી અધિક્ષક, કર્નલ (નિવૃત્ત) ડૉ બીબી કુલકર્ણીએ તાળીઓના ગડગડાટ વચ્ચે કબૂતરને મુક્ત કર્યું.

કબૂતર કહે, જાસૂસીની વાત છે!
જાસૂસીની શંકામાં પકડાયેલું આ પહેલું કબૂતર નથી. સીમા સુરક્ષા અધિકારીઓએ 2016માં એક કબૂતરની અટકાયત કરી હતી. જ્યારે તે પાકિસ્તાન બોર્ડર પાસે વડાપ્રધાન નરેન્દ્ર મોદી માટે ધમકીભર્યો મેસેજ લઈને પકડાયો હતો.

2010માં વધુ એક કબૂતરને કડક સુરક્ષા હેઠળ રાખવામાં આવ્યું હતું. તેના પગમાં રિંગ હતી અને તેના શરીર પર લાલ શાહીથી પાકિસ્તાની ફોન નંબર અને સરનામું લખેલું હતું. ત્યારબાદ અધિકારીઓએ નિર્દેશ આપ્યો કે કોઈને પણ કબૂતરને મળવા દેવા ન જોઈએ. પોલીસે કહ્યું હતું કે તે 'સ્પેશિયલ જાસૂસી મિશન' પર હોઈ શકે છે.