Odisha Assembly: ଚାଲି ପାରିଲାନି ବିଧାନସଭା, ମହାତ୍ମା ଗାନ୍ଧିଙ୍କ ପ୍ରତିମୂର୍ତ୍ତି ତଳେ ବିଜେଡି ବିଧାୟକ

Odisha Assembly: ଭୁବନେଶ୍ୱର:  ମିଶନଶକ୍ତି ପ୍ରସଙ୍ଗକୁ କେନ୍ଦ୍ରକରି ଆଜି ବିଧାନସଭାରେ ଗୃହ ଚାଲିପାରି ନାହିଁ। ପ୍ରଶ୍ନୋତ୍ତର କାଳକୁ ବି ବାତିଲ କରିବାକୁ ବାଧ୍ୟ ହୋଇଛନ୍ତି ବାଚସ୍ପତି ସୁରମା ପାଢ଼ୀ। ଗୃହ ଆରମ୍ଭ ହେବା କ୍ଷଣି ବାଚସ୍ପତି ଗୃହକୁ ଅପରାହ୍ଣ ୩ଟା ଯାଏ ମୁଲତବୀ ଘୋଷଣା କରିଛନ୍ତି। 

ଗୃହ ଆରମ୍ଭରୁ ବିରୋଧୀ ବିଜେଡି ବିଧାୟକମାନେ ମିଶନ ଶକ୍ତି ପ୍ରସଙ୍ଗକୁ ନେଇ ଗୃହର ମଧ୍ୟଭାଗକୁ ଆସିଥିଲେ। ଏହି  ଅନୁଷ୍ଠାନକୁ ଗୈରୀକରଣ କରାଯାଉଛି ବୋଲି ଅଭିଯୋଗ କରିଥିଲେ। ନୂଆ ନିର୍ବାହୀ କମିଟି ଗଠନକୁ ବିରୋଧ କରିଥିଲେ। ଅପରପକ୍ଷେ ଶାସକ ଦଳର ବିଧାୟକମାନେ ଏହାକୁ ବିରୋଧ କରିଥିଲେ। ଫଳରେ ଗୃହରେ ହଟ୍ଟଗୋଳ ସୃଷ୍ଟି ହୋଇଥିଲା। ଗୃହକୁ  ଶୃଙ୍ଖଳା ଭିତରକୁ ଆଣିବା ଲାଗି ବାଚସ୍ପତି ଅନୁରୋଧ କରିଥିଲେ। ହେଲେ ଗୃହ ଅନିୟନ୍ତ୍ରିତ ହେବାରୁ ବାଚସ୍ପତି ଅପରାହ୍ଣ ତିନିଟା ଯାଏ ଗୃହକୁ ମୁଲତବୀ କରିଛନ୍ତି। 

ପରେ ବିଜେଡିର ବିଧାୟକମାନେ ବିଧାନସଭା ପରିସରରେ ଥିବା ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତି ତଳେ ଧାରଣା ଦେଇଥିଲେ। ଏହି ସମୟରେ ସେମାନେ ଗୃହକୁ ନେଇଥିବା ପ୍ଲାକାର୍ଡକୁ ପ୍ରଦର୍ଶନ କରିଥିଲେ। ‘ମିଶନଶକ୍ତିକୁ ଗୈରିକରଣ କରିବା ବନ୍ଦକର‘, ମିଶନଶକ୍ତି ଇସି ପୁନର୍ଗଠନ ବନ୍ଦ କର ଭଳି ସ୍ଲୋଗାନ ଦେଇଥିଲେ। ବରିଷ୍ଠ ବିଧାୟକ ଅରୁଣ ସାହୁ ବିଭିନ୍ନ ସ୍ଲାଗାନ୍‍ ଦେଇ ଏହି ବିକ୍ଷୋଭର ନେତୃତ୍ୱ ନେଇଥିଲେ।