CRPF New DG: ଆଇପିଏସ୍ ଜ୍ଞାନେନ୍ଦ୍ର ପ୍ରତାପ ସିଂହ କିଏ? CRPF ର ନୂତନ DG ଭାବେ ନିଯୁକ୍ତ କଲେ କେନ୍ଦ୍ର ସରକାର

Who Is IPS Gyanendra Pratap Singh: କେନ୍ଦ୍ର ସରକାର ଜ୍ଞାନେନ୍ଦ୍ର ପ୍ରତାପ ସିଂହଙ୍କୁ କେନ୍ଦ୍ରୀୟ ରିଜର୍ଭ ପୋଲିସ ଫୋର୍ସ (CRPF)ର ନୂତନ ମହାନିର୍ଦ୍ଦେଶକ (DG) ଭାବରେ ନିଯୁକ୍ତ କରିଛନ୍ତି। ଶନିବାର ଦିନ ବିଳମ୍ବିତ ରାତିରେ ଜାରି ହୋଇଥିବା ଏକ ବିଭାଗୀୟ ନିର୍ଦ୍ଦେଶ ଅନୁଯାୟୀ, କେନ୍ଦ୍ର ଗୃହ ମନ୍ତ୍ରଣାଳୟର ପ୍ରସ୍ତାବକୁ କ୍ୟାବିନେଟ୍ ନିଯୁକ୍ତି କମିଟି (ଏସିସି) ଅନୁମୋଦନ କରିଛି। ଏହି ନିର୍ଦ୍ଦେଶ ଡିପାର୍ଟମେଣ୍ଟ ଅଫ୍ ପର୍ସନାଲ ଆଣ୍ଡ ଟ୍ରେନିଂ (DoPT) ଦ୍ୱାରା ଜାରି କରାଯାଇଛି। ଆଦେଶରେ ଲେଖାଯାଇଛି, "ଆସାମ କ୍ୟାଡରର ୧୯୯୧ ବ୍ୟାଚ୍ ଆଇପିଏସ୍ ଜିପି ସିଂହଙ୍କୁ ସିଆରପିଏଫର ମହାନିର୍ଦ୍ଦେଶକ ଭାବରେ ନିଯୁକ୍ତି ଦେବା ପାଇଁ ଗୃହ ମନ୍ତ୍ରଣାଳୟର ପ୍ରସ୍ତାବକୁ ଏସିସି ଅନୁମୋଦନ କରୁଛି।"

ଜ୍ଞାନେନ୍ଦ୍ର ସିଂହ ପୂର୍ବରୁ ଆସାମ ପୋଲିସ ମୁଖ୍ୟଙ୍କ ଦାୟିତ୍ୱରେ ଥିଲେ। ଏବେ ସେ CRPFର ମୁଖ୍ୟ ଭାବରେ କାର୍ଯ୍ୟ କରିବେ। ସେ ୩୧ ଜାନୁଆରୀ ୨୦୨୭ ରେ ଅବସର ନେବାକୁ ଯାଉଛନ୍ତି। ନୂତନ ସିଆରପିଏଫ ଡିଜି ଜିପି ସିଂହ ପୂର୍ବରୁ ସ୍ୱତନ୍ତ୍ର ସୁରକ୍ଷା ଗୋଷ୍ଠୀ (ଏସପିଜି) ଏବଂ ଜାତୀୟ ତଦନ୍ତ ସଂସ୍ଥା (ଏନଆଇଏ) ଭଳି ଗୁରୁତ୍ୱପୂର୍ଣ୍ଣ ପଦବୀରେ କାର୍ଯ୍ୟ କରିଛନ୍ତି। ଏହା ବ୍ୟତୀତ ସେ ଆସାମ ପୋଲିସରେ ଅନେକ ବରିଷ୍ଠ ପଦବୀରେ ମଧ୍ୟ କାର୍ଯ୍ୟ କରିଛନ୍ତି।

କହିରଖୁଛୁ ଯେ ଗତ ମାସରେ ଗୃହ ମନ୍ତ୍ରଣାଳୟ (MHA) ୧୯୯୩ ବ୍ୟାଚ୍ ଆଇପିଏସ୍ ଅଧିକାରୀ ଭିତୁଲ କୁମାରଙ୍କୁ CRPFର ଡିଜିର ଅତିରିକ୍ତ ଦାୟିତ୍ୱ ହସ୍ତାନ୍ତର କରିଥିଲା। ତତ୍କାଳୀନ ଡିଜି ଅନିଶ ଦୟାଲ ସିଂହ ଡିସେମ୍ବର ୩୧ ତାରିଖରେ ଅବସର ନେଇଥିଲେ।

CRPF ହେଉଛି ଭାରତର ସବୁଠାରୁ ବଡ଼ ଅର୍ଦ୍ଧସାମରିକ ବାହିନୀ ଯାହାର ପ୍ରାୟ ୩୦୦,୦୦୦ କର୍ମଚାରୀ ଅଛନ୍ତି। ଏହି ବାହିନୀ ଜମ୍ମୁ ଏବଂ କାଶ୍ମୀରରେ ଆତଙ୍କବାଦ ବିରୋଧୀ ଅଭିଯାନ, ଉତ୍ତର-ପୂର୍ବରେ ବିଦ୍ରୋହ ବିରୋଧୀ ଅଭିଯାନ ଏବଂ ବାମପନ୍ଥୀ ଉଗ୍ରବାଦ (LWE) ପ୍ରଭାବିତ ରାଜ୍ୟଗୁଡ଼ିକରେ ନକ୍ସଲ ବିରୋଧୀ ଅଭିଯାନରେ ସାମିଲ ଅଛି।