હવામાનમાં આવી શકે છે જોરદાર પલટો, ફેબ્રુઆરીમાં આસમાની આફતનો ખતરો! જાણો નવી આગાહી

અમદાવાદ હવામાન વિભાગ કેન્દ્રએએ જણાવ્યું કે રાજ્યમાં આગામી પાંચ દિવસ તાપમાન યથાવત રહેશે. લઘુત્તમ તાપમાનમાં કોઈ મોટો ફેરફાર થશે નહીં. હવામાન વિભાગ પ્રમાણે રાજ્યમાં પવનની દિશા બદલાઈ રહી છે. આગામી સાત દિવસ વાતાવરણ સૂકુ રહેશે. એટલે કે સવારે અને રાત્રે ઠંડી તો બપોરે ગરમીનો અનુભવ થઈ શકે છે.

હવામાન વિભાગે આપેલી માગિતી પ્રમાણે ગુજરાતમાં છેલ્લા 24 કલાકમાં સૌથી વધુ ઠંડી નલિયામાં પડી છે. નલિયાનું તાપમાન 9.8 ડિગ્રી નોંધાયું છે. તો પોરબંદરમાં 12.6 ડિગ્રી, ગાંધીનગરમાં 13.5, અમદાવાદમાં 13.8, વડોદરામાં 15.4 અને સુરતમાં 18.8 ડિગ્રી લઘુત્તમ તાપમાન નોંધાયું છે. 

હવામાન નિષ્ણાંત અંબાલાલ પટેલની આગાહી અનુસાર, આગામી બે દિવસ પવનની ગતિ વધુ રહેશે. મધ્ય ગુજરાતના ભાગોમાં પવનની ગતિ 15 કિમી પ્રતિ કલાકની રહેશે. ઉત્તર ગુજરાતના ભાગોમાં પણ પવનની ગતિ 15 કિમી પ્રતિ કલાકની રહેવાની શક્યતા છે. તો જુનાગઢના ભાગોમાં પવનની ગતિ 12થી 15 કિમી પ્રતિ કલાક રહેશે. દક્ષિણ ગુજરાતના ભાગોમાં પવનની ગતિ 16 કિમી પ્રતિ કલાક રહેવાની શક્યતા છે. કચ્છના ભાગોમાં પવનની ગતિ વધુ રહેશે. રાજકોટના ભાગોમાં પણ પવનની ગતિ 15 કિમી પ્રતિ કલાકની રહેશે.

 8, 9 અને 10 તારીખે તાપમાનમાં વધારો થશે. બદલાતા વાતાવરણની સાથે અંબાલાલ પટેલે ગુજરાતના નાગરિકોને ચેતવણી પણ આપી છે. તેમણે કહ્યું કે, આ દિવસોમાં સવારે હિમાયળું હવામાન રહેશે. 9 થી 11 ફેબ્રુઆરીમાં ફરી હવામાન પલટાય તેવી શક્યતા છે. 11 અને 12 ફરી ઉત્તર ભારતમાં હિમવર્ષા રહેતા સવારે ઠંડી રહેશે. તો 19 ફેબ્રુઆરીથી ગરમીની શક્યતા દેખાઈ રહી છે. 19 ફેબ્રુઆરીથી 14 એપ્રિલ સુધી રોગીસ્ટ હવામાન રહેશે, જેથી લોકોએ સાવચેતી રાખવી જરૂરી છે. 23 થી ફેબ્રુઆરીના અંત સુધીમાં વાદળવાયુ અને કમોસમી વરસાદના એંધાણ છે.  

રાજ્યના ભાગો પર એક પ્રેશર ગેડિયન્ટ સર્જાયું છે, જેના કારણે પવનની ગતિ વધી છે. ગુજરાતમાં 35થી 40 કિમી પ્રતિ કલાકની ઝડપે પવનો ફૂંકાઈ રહ્યાં છે. તેમણે જણાવ્યું કે, રાજ્યમાં તાપમાનમાં બે-ત્રણ ડિગ્રીનો વધારો થવાને કારણે લોકોને આંશિક ગરમીનો અનુભવ થઈ શકે છે.