1158 ਸਹਾਇਕ ਪ੍ਰੋਫੈਸਰਾਂ ਨੇ ਪੱਕੇ ਧਰਨੇ ਦੇ 29ਵੇਂ ਦਿਨ ਆਪਣੀ ਨਿਯੁਕਤੀ ਲਈ ਰੋਸ ਪ੍ਰਦਰਸ਼ਨ ਕੀਤਾ

Mohali News: 1158 ਸਹਾਇਕ ਪ੍ਰੋਫ਼ੈਸਰ ਅਤੇ ਲਾਇਬ੍ਰੇਰੀਅਨ ਫ਼ਰੰਟ ਵੱਲੋਂ ਮੋਹਾਲੀ ਵਿਖੇ ਸਿੱਖਿਆ ਵਿਭਾਗ ਦੀ ਸੱਤਵੀਂ ਮੰਜ਼ਿਲ ’ਤੇ ਸਥਿਤ ਡਾਇਰੈਕਟਰ ਉਚੇਰੀ ਸਿੱਖਿਆ ਦੇ ਦਫ਼ਤਰ ਅੱਗੇ ਚੱਲ ਰਿਹਾ ਦਿਨ ਰਾਤ ਦਾ ਮੋਰਚਾ 29ਵੇਂ ਦਿਨ ਵੀ ਜਾਰੀ ਰਿਹਾ। ਅੱਜ 1158 ਪ੍ਰੋਫੈਸਰ ਭਰਤੀ ਵਿੱਚੋਂ ਰਹਿੰਦੇ 240 ਸਹਾਇਕ ਪ੍ਰੋਫੈਸਰਾਂ ਨੇ ਸੋਹਾਣਾ ਬੱਤੀਆਂ, ਏਅਰਪੋਰਟ ਰੋਡ ਮੁਹਾਲੀ ਵਿਖੇ ਜ਼ੋਰਦਾਰ ਰੋਸ ਪਰਦਰਸ਼ਨ ਕੀਤਾ। 

ਆਗੂ ਬਲਵਿੰਦਰ ਚਹਿਲ ਨੇ ਆਪ ਸਰਕਾਰ ਦੇ ਸਿੱਖਿਆ ਮਾਡਲ ਦੀ ਪੋਲ ਖੋਲ੍ਹਦਿਆਂ ਕਿਹਾ ਕਿ ਭਗਵੰਤ ਮਾਨ ਦੀ ਸਰਕਾਰ ਨੇ ਕੋਈ ਵੀ ਭਰਤੀ ਮੁਕੰਮਲ ਰੂਪ ਵਿਚ ਪੂਰੀ ਨਹੀਂ ਕੀਤੀ। ਅਸੀਂ 1158 ਸਹਾਇਕ ਪ੍ਰੋਫ਼ੈਸਰ ਭਰਤੀ ਨੂੰ ਪੂਰਾ ਕਰਵਾਉਣ ਲਈ ਪਿਛਲੇ ਸਾਢੇ ਤਿੰਨ ਸਾਲ ਤੋਂ ਸੰਘਰਸ਼ ਕਰ ਰਹੇ ਹਾਂ। ਅਜੇ ਵੀ ਭਰਤੀ ਵਿੱਚੋਂ 240 ਉਮੀਦਵਾਰ ਰਹਿੰਦੇ ਹਨ। ਉਹਨਾਂ ਕਿਹਾ ਕਿ ਜਿਵੇਂ ਅਸੀਂ ਪਹਿਲਾਂ ਲਾਠੀਚਾਰਜ ਸਹਿਆ , ਜੇਲ੍ਹ ਕਟੀ ਉਸੇ ਤਰਾਂ ਇਸ ਭਰਤੀ ਨੂੰ ਪੂਰਾ ਕਰਵਾਉਣ ਲਈ ਹਰ ਕਿਸਮ ਦੀ ਲੜ੍ਹਾਈ ਲੜ੍ਹਦੇ ਰਹਾਂਗੇ, ਸੰਘਰਸ਼ ਨੂੰ ਤਿੱਖਾ ਕਰਾਂਗੇ।

ਪ੍ਰਿਤਪਾਲ ਸਿੰਘ ਨੇ ਆਖਿਆ ਕਿ ਸਿੱਖਿਆ ਕ੍ਰਾਂਤੀ ਦਾ ਨਾਹਰਾ ਮਾਰਨ ਵਾਲੀ ਸਰਕਾਰ ਅਧਿਆਪਕਾਂ ਨੂੰ ਸਕੂਲਾਂ, ਕਾਲਜਾਂ ਵਿੱਚ ਭੇਜਣ ਦੀ ਬਜਾਏ ਸੜਕਾਂ,  ਠਾਣਿਆਂ ਅਤੇ ਜੇਲਾਂ ਵਿੱਚ ਰੋਲ ਰਹੀ ਹੈ। ਪੰਜਾਬ ਦੇ ਸਰਕਾਰੀ ਕਾਲਜ ਵੈਂਟੀਲੇਟਰ 'ਤੇ ਹਨ ਇਹਨਾਂ ਕਾਲਜਾਂ ਦੀ ਹਾਲਤ ਉਦੋਂ ਹੀ ਸੁਧਰਨੀ ਸੰਭਵ ਹੈ ਜਦੋਂ 1158 ਸਹਾਇਕ ਪ੍ਰੋਫੈਸਰਾਂ ਦੀ ਭਰਤੀ ਮੁਕੰਮਲ ਹੋ ਜਾਏਗੀ। ਉਹਨਾਂ ਨੇ ਸਰਕਾਰ ਨੂੰ ਅਪੀਲ ਕੀਤੀ ਕਿ ਇਸ ਭਰਤੀ ਦੇ ਰਹਿੰਦੇ ਵਿਸ਼ਿਆਂ ਦਾ ਨਤੀਜਾ ਜਾਰੀ ਕਰਕੇ ਅਤੇ ਰਹਿੰਦੀ ਕਾਉਂਸਲਿੰਗ ਨੂੰ ਮੁਕੰਮਲ ਕਰਕੇ 240 ਸਾਥੀਆਂ ਨੂੰ ਜਲਦੀ ਤੋਂ ਜਲਦੀ ਕਾਲਜਾਂ ਵਿੱਚ ਭੇਜਿਆ ਜਾਵੇ।

ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਸਰਕਾਰ ਦੀ ਨਾਕਾਮੀ ਨੇ ਇਸ ਭਰਤੀ ਨੂੰ ਵੱਖ ਵੱਖ ਹਿੱਸਿਆਂ ਵਿੱਚ ਵੰਡ ਦਿੱਤਾ ਹੈ। 2021 ਵਿੱਚ 122,  2024 ਵਿੱਚ 483 ਅਤੇ ਜਨਵਰੀ 2025 ਵਿੱਚ 313 ਉਮੀਦਵਾਰਾਂ ਨੂੰ ਜੁਆਇੰਨ ਕਰਵਾਇਆ ਗਿਆ ਜਦਕਿ ਹਾਲੇ ਵੀ 240 ਉਮੀਦਵਾਰ ਭਰਤੀ ਤੋਂ ਬਾਹਰ ਬੈਠੇ ਹਨ। ਸਰਕਾਰ ਨੇ ਪੜ੍ਹੇ ਲਿਖੇ ਬੇਰੁਜ਼ਗਾਰ ਨੌਜਵਾਨਾਂ ਨੂੰ ਫ਼ਰਸ਼ਾਂ ਤੇ ਰੁਲਣ ਲਈ ਮਜ਼ਬੂਰ ਕੀਤਾ ਗਿਆ। ਜੇਕਰ ਹਾਲਾਤ ਇਵੇਂ ਚਲਦੇ ਰਹੇ ਤਾਂ ਦਿੱਲੀ ਵਾਂਗ 2027 ਵਿੱਚ ਪੰਜਾਬ ਵਿੱਚੋਂ ਵੀ ਆਪ ਦਾ ਸਫ਼ਾਇਆ ਹੋਣਾ ਤੈਅ ਹੈ।

ਮੈਡਮ ਗੋਲਡੀ ਰਾਣੀ ਅਤੇ ਗੁਰਲਾਲ ਸਿੰਘ ਨੇ ਦੱਸਿਆ ਕਿ ਚੱਲ ਰਹੇ ਧਰਨੇ ਦੇ 29 ਦਿਨ ਪੂਰੇ ਹੋ ਚੁੱਕੇ ਹਨ। ਸਿੱਖਿਆ ਇਨਕਲਾਬ ਦੀ ਗੱਲ ਕਰਨ ਵਾਲੀ ਇਹ ਸਰਕਾਰ ਕੋਈ ਗੱਲ ਨਹੀਂ ਸੁਣ ਰਹੀ। ਤ੍ਰਾਸਦੀ ਇਹ ਹੈ ਕਿ ਉਮੀਦਵਾਰਾਂ ਦੇ ਨਾਲ ਧਰਨੇ ਤੇ ਬੈਠੇ ਬੱਚੇ ਆਪਣੇ ਮਾਪਿਆਂ ਦੀ ਨੌਕਰੀ ਲਈ ਸਰਕਾਰ ਨੂੰ ਗੁਹਾਰ ਲਗਾ ਰਹੇ ਹਨ। ਉਹਨਾਂ ਨੇ ਸਰਕਾਰ ਨੂੰ ਚਿਤਾਵਨੀ ਦਿੱਤੀ ਕਿ 1158 ਸਹਾਇਕ ਪ੍ਰੋਫੈਸਰ ਫਰੰਟ ਪੰਜਾਬ 240 ਸਾਥੀਆਂ ਦੀ ਜੁਆਇਨਿੰਗ ਲਈ ਹਰ ਕਿਸਮ ਦਾ ਤਿੱਖਾ ਸੰਘਰਸ਼ ਕਰਨ ਦੇ ਲਈ ਤਿਆਰ ਹੈ।