1.Utkarsh Odisha: ଉତ୍କର୍ଷ ଓଡ଼ିଶା- ମେକ୍ ଇନ ଓଡ଼ିଶା କନକ୍ଲେଭ ୨୦୨୫ କାର୍ଯ୍ୟକ୍ରମ ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଆଜି ଜନତା ମଇଦାନଠାରେ ଓଡ଼ିଶାରେ ପୁଞ୍ଜିନିବେଶ ପାଇଁ ଆଗ୍ରହୀ ଥିବା ବିଭିନ୍ନ କମ୍ପାନୀର ସିଇଓ ମାନଙ୍କ ସହିତ ସ୍ଵତନ୍ତ୍ର ଭାବେ ଆଲୋଚନା କରିଛନ୍ତି । ଏହି ଆଲୋଚନାରେ ଇସ୍ପାତ, ଗ୍ରୀନ ଏନର୍ଜି, ଗ୍ରୀନ ଅମୋନିଆ, ଗ୍ରୀନ ହାଇଡ୍ରୋଜେନ, ଅକ୍ଷୟ ଶକ୍ତି, କେମିକାଲ୍ସ, ସେମିକଣ୍ଡକ୍ଟର, ଆଇଟି, ସିମେଣ୍ଟ ଭଳି କ୍ଷେତ୍ରର ପ୍ରାୟ ୧୦୦ରୁ ଉର୍ଦ୍ଧ୍ବ ପ୍ରତିଷ୍ଠିତ କମ୍ପାନୀର ସିଇଓମାନେ ଅଂଶଗ୍ରହଣ କରିଥିଲେ ।
2.Odisha News: ଆନ୍ଧ୍ରପ୍ରଦେଶ ଏବଂ ଛତିଶଗଡ଼ର ପୂର୍ବତନ ରାଜ୍ୟପାଳ ତଥା ବରିଷ୍ଠ ବିଜେପି ନେତା ବିଶ୍ୱଭୂଷଣ ହରିଚନ୍ଦନ ଅସୁସ୍ଥ ହୋଇପଡ଼ିଛନ୍ତି। ବାର୍ଦ୍ଦକ୍ୟ କାରଣରୁ ବିଭିନ୍ନ ଅସୁସ୍ଥତାରେ ରହିଛନ୍ତି ବିଶ୍ୱଭୂଷଣ। ଚିକିତ୍ସା ଲାାଗି ତାଙ୍କୁ ଭୁବନେଶ୍ୱରର ଏକ ହସ୍ପିଟାଲ୍ରେ ଭର୍ତ୍ତି କରାଯାଇଛି। ଅଧିକ ଚିକିତ୍ସା ପାଇଁ ତାଙ୍କୁ ହାଇଦ୍ରାବାଦ୍ ପଠାଯାଇପାରେ ବୋଲି ତାଙ୍କ ପୁଅ ତଥା ଆଇନମନ୍ତ୍ରୀ ପୃଥ୍ୱୀରାଜ ହରିଚନ୍ଦନ ସୂଚନା ଦେଇଛନ୍ତି।
3.Falcon Group: ଫାଲକନ୍ ହୋଲ୍ଡିଂସ୍ ପ୍ରାଇଭେଟ୍ ଲିମିଟେଡ ହେଉଛି ଫାଲକନ ଦଳର ଏକ ମୁଖ୍ୟ ଭାଗ ଯାହା ଓଡ଼ିଶାର ଏକ ଘରୋଇ ବ୍ୟବସାୟ ସଂସ୍ଥା । ଏହା ଟିଟାନିୟମ୍ ଡାଇଓକ୍ସାଇଡ୍ (TiO2) ଉତ୍ପାଦନକୁ ପୁନର୍ବିକାସ କରିବାକୁ ଯାଉଛି। ଯାହାପାଇଁ ୧୦୫୦ କୋଟି ନିବେଶ କରାଯିବାର ସ୍ଥିର ହୋଇଛି । ଏହି ପ୍ଲାଣ୍ଟର ଉତ୍ପାଦନ କ୍ଷମତା ୩୦,୦୦୦ଟନ୍ (KTPA) ହେବାକୁ ଥିବାବେଳେ ଏହା ଦ୍ୱାରା ପେଣ୍ଟସ, କୋଟିଙ୍ଗ, ପ୍ଲାସ୍ଟିକ୍ସ ଏବଂ ବସ୍ତ୍ର ଶିଳ୍ପରେ TiO2 ର ଉତ୍ପାଦନ ଆବଶ୍ୟକତା ପୂରଣ କରାଯିବ। ଏହା ସହ ୪୫୦ କୋଟିର ମଲ୍ଟି-ଅର୍ଗାନ ଟ୍ରାନ୍ସପ୍ଲାଣ୍ଟ କମ୍ପ୍ଲେକ୍ସ ଏବଂ ଏଆଇ ଏବଂ ରୋବୋଟିକ୍ ଚିକିତ୍ସା ସୁବିଧା ସହିତ ୫୦୦ ଶଯ୍ୟା ବିଶିଷ୍ଟ ମଲ୍ଟି-ସ୍ପେଶାଲିଟି ହସ୍ପିଟାଲ ମଧ୍ୟ ଖୋଲିବ।
4.Srilanka Navy: ଶ୍ରୀଲଙ୍କା ଉଚ୍ଚାୟୁକ୍ତଙ୍କୁ ଡକାଇ ନିନ୍ଦା କରିଛି ଭାରତ। ଆଜି ସକାଳେ ଶ୍ରୀଲଙ୍କାର ଡେଲ୍ଫ ଦ୍ବୀପରେ ମାଛ ଧରିବାକୁ ଯାଇଥିବା ୧୩ ଜଣ ଧୀବରଙ୍କ ଉପରକୁ ଗୁଳି ଚଳାଇବାକୁ ଅତ୍ୟନ୍ତ କଠୋର ଭାଷାରେ ନିନ୍ଦା କରାଯାଇଥିବା କହିଛନ୍ତି ବୈଦେଶିକ ମନ୍ତ୍ରଣାଳୟ। କୌଣସି ପରିସ୍ଥିତିରେ ଗୁଳି ଚଳାଇବା ଉଚିତ ନୁହେଁ ବୋଲି ଭାରତ ପକ୍ଷରୁ କୁହାଯାଇଛି।
5.JPC: ଲୋକସଭାରୁ ଯୁଗ୍ମ ସଂସଦୀୟ କମିଟି ( ଜେପିସି)କୁ ପଠାଯାଇଥିବା ଓ୍ୱାକଫ୍ ସଂଶୋଧନ ବିଧେୟକକୁ ଅନେକ ଆଲୋଚନା, ପର୍ଯ୍ୟାଲୋଚନା ଓ ସମାଲୋଚନା ପରେ ୨୫ ସଂଶୋଧନ ପ୍ରସ୍ତୁତ ହୋଇଛି। ଗତ ୬ ମାସ ହେଲା ଏହି କମିଟି ପର୍ଯ୍ୟାୟ ଭିତ୍ତିରେ ସମସ୍ତ ଅନୁଚ୍ଛେଦକୁ ତନ୍ନତନ୍ନ କରି ବିଚାର କରିଥିଲେ। ଏହାପରେ ୧୪ଟି ଅନୁଚ୍ଛେଦର ୨୫ଟି ସ୍ଥାନରେ ସଂଶୋଧନ ପାଇଁ ବାଚସ୍ପତିଙ୍କୁ ନିଜର ପ୍ରସ୍ତାବ ପ୍ରଦାନ କରିବେ। ଭୋଟିଂ ମାଧ୍ୟମରେ ଏହି ସଂଶୋଧନ ଲାଗି କମିଟି ବହୁମତରେ ରାଜି ହୋଇଛି। ଆସନ୍ତା କାଲି ଏ ବାବଦରେ ଏକ ସଂକଳ୍ପ ପାରିତ କରାଯାଇ ତାହାକୁ ବାଚଦ୍ପତିଙ୍କୁ ପ୍ରଦାନ କରାଯିବ ବୋଲି ଓ୍ୱାକଫ୍ ସଂଶୋଧନ ପାଇଁ ଗଠିତ ଜେପିସିର ଅଧ୍ୟକ୍ଷ ଜଗଦମ୍ବିକା ପାଲ୍ କହିଛନ୍ତି।
6.Bedanta: ରାୟଗଡ଼ାରେ ଆଲୁମିନିୟମ ପ୍ଲାଣ୍ଟ କରିବ ବେଦାନ୍ତ । ୩୦ ଲକ୍ଷ ଟନ୍ର ପ୍ଲାଣ୍ଟ ହେବା ନେଇ ଅନୀଲ ଅଗ୍ରୱାଲ ସୂଚନା ଦେଇଛନ୍ତି। ଏହା ସହ ସେ କହିଛନ୍ତି ଯେ, ଓଡ଼ିଶା ମତେ ସ୍ୱର୍ଗ ପରି ଲାଗେ । ସେହିପରି ଗୋପାଳପୁରରେ ୨୦ ହଜାର କୋଟି ଟଙ୍କାର ପୁଞ୍ଜି ନିବେଶ କରିବ ଆବାଡା ଗ୍ରୁପ। ପାରାଦୀପରେ ଏକ ନୂଆ ପ୍ରକଳ୍ପ ପାଇଁ ରାଜ୍ୟ ସରକାରଙ୍କ ସହ ଏମଓୟୁ ସ୍ବାକ୍ଷରିତ କରିବାକୁ ଯାଉଛି ଆବାଡା ଗ୍ରୁପ। ଆବାଡା ଗ୍ରୁପ ମୁଖ୍ୟ ଭିନୀତ ମିତ୍ତଲ ଗଣମାଧ୍ୟମ ପ୍ରତିନିଧିଙ୍କୁ ସାକ୍ଷାତକାର ସମୟରେ ଏହା କହିଛନ୍ତି ।
7. Aditya Birla: ଓଡ଼ିଶାରେ ୫୦ ହଜାର କୋଟି ନିବେଶ କରିବାକୁ ଯାଉଛି ଆଦିତ୍ୟ ବିର୍ଲା ଗ୍ରୁପ । ଏନେଇ ସୂଚନା ଦେଇଛନ୍ତି ଆଦିତ୍ୟ ବିର୍ଲା ଗ୍ରୁପ ଅଧ୍ୟକ୍ଷ କୁମାର ମଙ୍ଗଲମ ବିର୍ଲା। ମୁଖ୍ୟମନ୍ତ୍ରୀ ମୋହନ ମାଝୀ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରିଛନ୍ତି ମଙ୍ଗଲମ । ସେହିପରି
କେନ୍ଦୁଝରରେ ଇସ୍ପାତ କାରଖାନା କରିବ JSW । ଏନେଇ ସୂଚନା ଦେଇଛନ୍ତି JSW ମୁଖ୍ୟ ସଜ୍ଜନ ଜିନ୍ଦଲ । ସେ କହିଛନ୍ତି ପୋସ୍କୋ ସହ ଏନେଇ ଆଲୋଚନା ଚାଲିଛି। ୩୦ରୁ ୪୦ ହଜାର କୋଟିର ପୁଞ୍ଜିନିବେଶ ଲକ୍ଷ୍ୟ ରହିଛି ।
8.Toll Tax: ମହାରାଷ୍ଟ୍ରର ଦେବେନ୍ଦ୍ର ଫଡନାଭିସ ସରକାର ମଙ୍ଗଳବାର ଅନୁଷ୍ଠିତ କ୍ୟାବିନେଟ୍ ବୈଠକରେ ଏକ ବଡ଼ ନିଷ୍ପତ୍ତି ନେଇଛନ୍ତି। ଅଟଳ ସେତୁରେ ଯାତ୍ରା କରୁଥିବା ଯାତ୍ରୀଙ୍କୁ ଆଶ୍ୱସ୍ତି ଦେଇ ସରକାର ଆଗାମୀ ଏକ ବର୍ଷ ପାଇଁ ଟୋଲ ଟିକସ ବୃଦ୍ଧି ନ କରିବାକୁ ଘୋଷଣା କରିଛନ୍ତି । ବର୍ତ୍ତମାନ ଅଟଳ ସେତୁ ଫ୍ଲାଏଓଭର ଉପରେ ୨୫୦ ଟଙ୍କା ଟୋଲ ଟିକସ ଆଦାୟ କରାଯାଉଛି । ଆସନ୍ତା ବର୍ଷ ପର୍ଯ୍ୟନ୍ତ ଏହା ସମାନ ରହିବ। ଫଡନାଭିସ ସରକାରଙ୍କ ଏହି ନିଷ୍ପତ୍ତି ମୁମ୍ବାଇ ଏବଂ ଏମଏମଆରଏ (ଆଖପାଖ) ଅଞ୍ଚଳର ଲୋକଙ୍କୁ ବହୁତ ଆଶ୍ୱସ୍ତି ଆଣିବ । ସେଓ୍ଵରୀ-ନହବାସେବ ଅଟଳ ସେତୁ ଟୋଲ୍ ଦେଇ ପ୍ରତିଦିନ ହଜାର ହଜାର ଗାଡ଼ି ଯାତାୟତ କରୁଛି।
9.Jasprit Bumrah: ୨୦୨୪ ଟିମ୍ ଇଣ୍ଡିଆର ଷ୍ଟାର ବୋଲର ଜସପ୍ରୀତ ବୁମ୍ରାଙ୍କ ପାଇଁ ସଫଳତାର ବର୍ଷ ଥିଲା। ଏହି ବର୍ଷ ସେ କେବଳ ଟିମ୍ ଇଣ୍ଡିଆରେ ଅମୂଲ୍ୟ ଅବଦାନ ଦେଇନାହାଁନ୍ତି ବରଂ ନିଜ ନାଁରେ ଅନେକ ରେକର୍ଡ ମଧ୍ୟ କରିଛନ୍ତି। ନିକଟରେ ବୁମ୍ରାଙ୍କୁ ଆଇସିସି 'ଟେଷ୍ଟ କ୍ରିକେଟର ଅଫ୍ ଦି ଇୟର' ଆୱାର୍ଡ କରାଯାଇଛି। ବର୍ତ୍ତମାନ ବୁମ୍ରାଙ୍କୁ ସାର୍ 'ଗାରଫିଲ୍ଡ ସୋବର୍ସ ଟ୍ରଫି' ମଧ୍ୟ ପ୍ରଦାନ କରାଯିବ, ଯାହାକି ଆଇସିସି ଦ୍ୱାରା ବର୍ଷର ଶ୍ରେଷ୍ଠ କ୍ରିକେଟରଙ୍କୁ ସମ୍ମାନିତ କରାଯାଇଛି। ଏହି ଟାଇଟଲ୍ ଜିତିବାରେ ସେ ୫ତମ ଭାରତୀୟ ଖେଳାଳି ହେବାକୁ ଯାଉଛି।
10.Ollywood News: ଓଡ଼ିଆ ସିନେମା 'ସନତାନୀ'କୁ ନେଇ ଏକ ବଡ଼ ଖବର ସମ୍ନାକୁ ଆସିଛି । ସିନେମା ରିଲିଜ୍ ହେଲେ ଦଙ୍ଗା ହୋଇପାରେ ବୋଲି ଗୁଇନ୍ଦା ବିଭାଗ ସତର୍କ କରାଇଛି। ପାଠକବନ୍ଧୁ ଓଡ଼ିଆ ଫିଲ୍ମ 'ସନାତନୀ'ର ଟ୍ରେଲର ରିଲିଜ୍ ହୋଇସାରିଛି। ମାସେ ତଳେ ରିଲିଜ୍ ହୋଇଥିବା ଏହି ଟ୍ରେଲରକୁ ଦର୍ଶକ ବହୁତ ଭଲ ପାଇବା ଦେଇଛନ୍ତି। ସିନେମାଟି ଧର୍ମକୁ ନେଇ ପ୍ରସ୍ତୁତ ହୋଇଥିବାରୁ ପୋଷ୍ଟର ରିଲିଜ ଠାରୁ ବିବାଦ ଲାଗି ରହିଛି। ତେବେ ଏହାର ଥିମ୍ ରହିଛି "କର୍ମ ହିଁ ଧର୍ମ"। ବିଦିଶା କ୍ରାଫ୍ଟ ବ୍ୟାନରରେ ବରିଷ୍ଠ ପ୍ରଯୋଜକ ବିଜୟ କଣ୍ଡୋଇଙ୍କ ପ୍ରଯୋଜନାରେ ସିନେମା ପ୍ରସ୍ତୁତ କରାଯାଇଛି। ଫିଲ୍ମ ଧର୍ମାନ୍ତରୀକରଣ ଉପରେ ଆଧାରିତ ହୋଇଛି । ଏଥିରେ ନାୟକ ରୂପେ ସମ୍ବିତ ଭିନ୍ନ ଭିନ୍ନ ଅବତାରରେ ନଜର ଆସିବେ।
3
 "Top 10 News: ଚୁଟକିରେ ପଢ଼ନ୍ତୁ ବର୍ତ୍ତମାନର ୧୦ଟି ଗୁରୁତ୍ୱପୂର୍ଣ୍ଣ ଖବର...")
