ಎಂಎಸ್‌ ಧೋನಿ ಬಳಿಕ ಮೈಸೂರು ಸ್ಯಾಂಡಲ್‌ ಸೋಪ್‌ಗೆ ಈ ನಟಿ ಬ್ರ್ಯಾಂಡ್‌ ಅಂಬಾಸಿಡರ್‌? ಕರ್ನಾಟಕದ ಹೆಮ್ಮೆಗೆ ಕನ್ನಡದವರು ಯಾರು ಗತಿಯೇ ಇಲ್ವಾ?

1 /8

ಭಾರತೀಯ ಕ್ರಿಕೆಟ್ ತಂಡದ ಮಾಜಿ ನಾಯಕ ಎಂಎಸ್ ಧೋನಿ ನಂತರ, ಐಕಾನಿಕ್ ಮೈಸೂರು ಸ್ಯಾಂಡಲ್ ಸೋಪ್ ತಯಾರಿಸುವ ಕರ್ನಾಟಕ ಸೋಪ್ಸ್ ಮತ್ತು ಡಿಟರ್ಜೆಂಟ್ಸ್ ಲಿಮಿಟೆಡ್ (ಕೆಎಸ್‌ಡಿಎಲ್) ಬಾಲಿವುಡ್ ನಟಿ ತಮನ್ನಾ ಭಾಟಿಯಾ ಅವರನ್ನು ತನ್ನ ಬ್ರಾಂಡ್ ರಾಯಭಾರಿಯಾಗಿ ನೇಮಿಸಿಕೊಳ್ಳುವ ಸಾಧ್ಯತೆಯಿದೆ ಎಂದು ಮೂಲಗಳು ಮನಿ ಕಂಟ್ರೋಲ್‌ ಸುದ್ದಿ ಸಂಸ್ಥೆಗೆ ತಿಳಿಸಿವೆ.

2 /8

ಶುದ್ಧ ಶ್ರೀಗಂಧದ ಎಣ್ಣೆಯಿಂದ ತಯಾರಿಸುವ ಸೋಪಿಗೆ ಹೆಸರುವಾಸಿಯಾದ ಕರ್ನಾಟಕ ಸರ್ಕಾರಿ ಸ್ವಾಮ್ಯದ ಕೆಎಸ್‌ಡಿಎಲ್, ಐಕಾನಿಕ್ ಮೈಸೂರು ಸ್ಯಾಂಡಲ್ ಸೋಪ್ ಸೇರಿದಂತೆ ವಿವಿಧ ಉತ್ಪನ್ನಗಳನ್ನು ಉತ್ಪಾದಿಸುತ್ತದೆ. ಕಂಪನಿಯು ಡಿಟರ್ಜೆಂಟ್‌ಗಳು, ಸೌಂದರ್ಯವರ್ಧಕಗಳು ಮತ್ತು ಧೂಪದ್ರವ್ಯದ ಕಡ್ಡಿಗಳನ್ನು ಸಹ ತಯಾರಿಸುತ್ತದೆ. ಇದೀಗ ಈ ಉತ್ಪನ್ನಗಳ ಆದಾಯವನ್ನು ಹೆಚ್ಚಿಸಲು ನೂತನ ಮಾರ್ಕೆಟಿಂಗ್ ತಂತ್ರಗಳನ್ನು ಅಳವಡಿಸಿಕೊಳ್ಳಲು ನಿರ್ಧರಿಸಿದೆ.  

3 /8

“ನಮ್ಮ ವ್ಯಾಪ್ತಿ ಮತ್ತು ಗೋಚರತೆಯನ್ನು ಹೆಚ್ಚಿಸಲು, ವಿಶೇಷವಾಗಿ ಕಿರಿಯ ಗ್ರಾಹಕರಲ್ಲಿ... ಹೀಗಿರುವಾಗ ನಮ್ಮ ರಾಯಭಾರಿಯನ್ನಾಗಿ ನಟಿ ತಮನ್ನಾ ಅವರನ್ನು ನೇಮಿಸಿಕೊಳ್ಳುವ ಚಿಂತನೆಯಲ್ಲಿದ್ದೇವೆ. ಮುಂದಿನ ತಿಂಗಳು ಇನ್ವೆಸ್ಟ್ ಕರ್ನಾಟಕ ಜಾಗತಿಕ ಹೂಡಿಕೆದಾರರ ಸಭೆಯಲ್ಲಿ ಅನಾವರಣಗೊಳ್ಳಲಿರುವ ಬ್ರ್ಯಾಂಡ್‌ನ ಬಣ್ಣ ಅಥವಾ ವ್ಯತಿರಿಕ್ತತೆಯನ್ನು ಬದಲಾಯಿಸದೆ ನಾವು ಮರುಬ್ರಾಂಡಿಂಗ್ ಅನ್ನು ಸಹ ಯೋಜಿಸುತ್ತಿದ್ದೇವೆ”ಎಂದು ಕೆಎಸ್‌ಡಿಎಲ್ ಅಧಿಕಾರಿಯೊಬ್ಬರು ಮನಿ ಕಂಟ್ರೋಲ್‌ಗೆ ತಿಳಿಸಿದ್ದಾರೆ.  

4 /8

"ಉತ್ತರ ಭಾರತದಲ್ಲಿ ನಮ್ಮ ಮಾರುಕಟ್ಟೆ ಪಾಲನ್ನು ವಿಸ್ತರಿಸುವುದು ನಮ್ಮ ಯೋಜನೆಯಾಗಿದೆ, ಅಲ್ಲಿ ನಾವು ಪ್ರಸ್ತುತ ಸುಮಾರು 6 ಪ್ರತಿಶತವನ್ನು ಹೊಂದಿದ್ದೇವೆ. ದಕ್ಷಿಣ ರಾಜ್ಯಗಳಲ್ಲಿ ಹೆಚ್ಚು ಪ್ರಾಬಲ್ಯ ಹೊಂದಿದ್ದೇವೆ. ಈ ಭಾಗದಲ್ಲಿ 81 ಪ್ರತಿಶತ ಪಾಲನ್ನು ಹೊಂದಿದ್ದೇವೆ" ಎಂದು ಹೇಳಿದ್ದಾರೆ.  

5 /8

2006 ರಲ್ಲಿ, ಧೋನಿ ಮೈಸೂರು ಸ್ಯಾಂಡಲ್ ಸೋಪ್‌ನ ಮೊದಲ ಬ್ರಾಂಡ್ ಅಂಬಾಸಿಡರ್‌ ಆಗಿ ನೇಮಕಗೊಂಡರು. ಆದರೆ ಧೋನಿ ಅವರು, ಬ್ರ್ಯಾಂಡ್ ಅನ್ನು ಪ್ರಚಾರ ಮಾಡಲು ಒಪ್ಪಿದ ಸಮಯವನ್ನು ನೀಡಲು ಅಸಮರ್ಥತೆ ತೋರಿದ್ದಾರೆ ಎಂದು ಉಲ್ಲೇಖಿಸಿ ಆ ಒಪ್ಪಂದವನ್ನು ಡಿಸೆಂಬರ್ 2007 ರಲ್ಲಿ ಕೆಎಸ್‌ಡಿಎಲ್ ರದ್ದುಗೊಳಿಸಿತು. ಅಷ್ಟೇ ಅಲ್ಲದೆ ಪರಿಹಾರವನ್ನು ಕೋರಿತು. ಆದರೆ, 2012 ರಲ್ಲಿ ಧೋನಿ ಪ್ರಕರಣವನ್ನು ಗೆಲ್ಲುವುದರ ಮೂಲಕ ಈ ವಿವಾದಕ್ಕೆ ಫುಲ್‌ಸ್ಟಾಪ್‌ ಬಿತ್ತು.  

6 /8

ಕರ್ನಾಟಕದ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಎಂಬಿ ಪಾಟೀಲ್ ಹೇಳಿರುವಂತೆ, “ಮೈಸೂರು ಸ್ಯಾಂಡಲ್ ಸೋಪ್ ಕರ್ನಾಟಕದ ಹೆಮ್ಮೆ. ನಾವು ಈ ಬ್ರ್ಯಾಂಡ್ ಅನ್ನು ಜಾಗತಿಕವಾಗಿ ವಿಸ್ತರಿಸಲು ಯೋಜಿಸಿದ್ದೇವೆ. ನಾವು ಈಗಾಗಲೇ ಹಲವಾರು ದೇಶಗಳಲ್ಲಿ ಅಸ್ತಿತ್ವವನ್ನು ಹೊಂದಿದ್ದರೂ, ನಾವು ಈ ಉತ್ಪನ್ನವನ್ನು ಪ್ರತಿ ದೇಶದಲ್ಲೂ ಪರಿಚಯಿಸಲು ಬಯಸುತ್ತೇವೆ" ಎಂದು ಹೇಳಿದ್ದಾರೆ.  

7 /8

KSDL ನ ಉತ್ಪನ್ನಗಳು ಈಗ 23 ದೇಶಗಳಲ್ಲಿ ಲಭ್ಯವಿದೆ. ಕಂಪನಿಯು ಮಾರ್ಚ್ 2026 ರ ವೇಳೆಗೆ 80 ದೇಶಗಳಿಗೆ ವಿಸ್ತರಿಸಲು ಯೋಜಿಸಿದೆ. ಅಂಡಾಕಾರದ ಆಕಾರಕ್ಕೆ ಹೆಸರುವಾಸಿಯಾದ ಮೈಸೂರು ಸ್ಯಾಂಡಲ್ ಸೋಪ್ ಅನ್ನು ಶುದ್ಧ ಶ್ರೀಗಂಧದ ಎಣ್ಣೆಯಿಂದ ತಯಾರಿಸಲಾಗುತ್ತದೆ. ಮೊದಲು 1918 ರಲ್ಲಿ ಬಿಡುಗಡೆಯಾದ ಇದು 2016 ರಲ್ಲಿ ತನ್ನ ಶತಮಾನೋತ್ಸವವನ್ನು ಆಚರಿಸಿತು. ಭಾರತದಲ್ಲಿ ಮಾರಾಟವಾಗುವ ಅತ್ಯಂತ ದುಬಾರಿ ಸೋಪ್ ಬ್ರಾಂಡ್‌ಗಳಲ್ಲಿ ಒಂದಾದ ಇದರ 'ಮಿಲೇನಿಯಮ್' ಸೋಪ್ (150-ಗ್ರಾಂ ಬಾರ್) ಬೆಲೆ 810 ರೂ.  

8 /8

ಮಾರುಕಟ್ಟೆಯಲ್ಲಿರುವ ಅನೇಕ ಕಂಪನಿಗಳು ಸಂಶ್ಲೇಷಿತ ಶ್ರೀಗಂಧದ ಎಣ್ಣೆಗಳನ್ನು ಬಳಸಿ ಶ್ರೀಗಂಧದ ಸೋಪ್‌ಗಳನ್ನು ತಯಾರಿಸುತ್ತವೆ. ಹೀಗಾಗಿ ನಕಲಿ ಮಾಡುವುದನ್ನು ತಡೆಯಲು ಪ್ರತಿಯೊಂದು ಉತ್ಪನ್ನದಲ್ಲೂ QR ಕೋಡ್‌ಗಳನ್ನು ಸೇರಿಸಲು KSDL ಯೋಜಿಸಿದೆ ಎಂದು ಸಂಸ್ಥೆಯ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.