Ludhiana News: ਸ਼ਰਾਰਤੀ ਅਨਸਰਾਂ ਨੇ ਮੁੰਡੀਆ ਕਲਾਂ 'ਚ ਕੀਤੀ ਸ਼ਰੇਆਮ ਗੁੰਡਾਗਰਦੀ; 6 ਕਾਰਾਂ ਦੇ ਤੋੜੇ ਸ਼ੀਸ਼ੇ ਇੱਕ ਬਾਈਕ ਨੂੰ ਲਗਾਈ ਅੱਗ

Ludhiana News: ਲੁਧਿਆਣਾ ਵਿੱਚ 33 ਫੁੱਟਾ ਰੋਡ, ਵਾਰਡ ਨੰਬਰ 23 ਮੁੰਡੀਆ ਕਲਾਂ, ਨਿਊ ਸੁੰਦਰ ਨਗਰ ਗਲੀ ਨੰਬਰ 1 ਵਿੱਚ ਸ਼ਰਾਰਤੀ ਅਨਸਰਾਂ ਨੇ ਗੁੰਡਾਗਰਦੀ ਕੀਤੀ । ਬਦਮਾਸ਼ਾਂ ਨੇ 6 ਵਾਹਨਾਂ ਦੇ ਸ਼ੀਸ਼ੇ ਤੋੜ ਦਿੱਤੇ ਅਤੇ ਇਕ ਮੋਟਰਸਾਈਕਲ ਨੂੰ ਅੱਗ ਲਗਾ ਦਿੱਤੀ। 

ਇਹ ਘਟਨਾ ਇਲਾਕੇ ਵਿੱਚ ਲੱਗੇ ਸੀਸੀਟੀਵੀ ਵਿੱਚ ਕੈਦ ਹੋ ਗਈ। ਹਮਲੇ 'ਚ ਕੁੱਲ 3 ਲੋਕ ਜ਼ਖਮੀ ਹੋਏ ਹਨ। ਜ਼ਖਮੀਆਂ 'ਚ ਸਪਨਾ ਪਾਂਡੇ, ਸ਼ੁਭਮ ਅਤੇ ਸਤਿਅਮ ਸ਼ਾਮਲ ਹਨ। ਇਸ ਘਟਨਾ ਤੋਂ ਬਾਅਦ ਇਲਾਕੇ ਦੇ ਲੋਕਾਂ 'ਚ ਦਹਿਸ਼ਤ ਦਾ ਮਾਹੌਲ ਹੈ।

ਜਾਣਕਾਰੀ ਦਿੰਦੇ ਹੋਏ ਪੀੜਤ ਸਪਨਾ ਪਾਂਡੇ ਨੇ ਦੱਸਿਆ ਕਿ ਉਸ ਨੇ ਫੋਨ ਵੇਚਣਾ ਸੀ। ਇਸ ਕਾਰਨ ਉਸ ਦੇ ਭਰਾ ਨੇ ਕੁਝ ਲੋਕਾਂ ਨੂੰ ਦੱਸਿਆ ਸੀ। ਅੱਜ ਕੁਝ ਨੌਜਵਾਨ ਮੋਬਾਈਲ ਖਰੀਦਣ ਦੇ ਬਹਾਨੇ ਉਸ ਦੇ ਘਰ ਦੇ ਬਾਹਰ ਆਏ। ਹੱਥ ਵਿੱਚ ਮੋਬਾਈਲ ਫੜ ਕੇ ਇੱਕ ਨੌਜਵਾਨ ਨੇ ਕਿਹਾ ਕਿ ਇਹ ਮੋਬਾਈਲ ਉਸ ਦਾ ਹੈ। 

ਸਪਨਾ ਮੁਤਾਬਕ ਉਸ ਦੇ ਭਰਾ ਸ਼ੁਭਮ ਨੇ ਇਸ ਲੜਕੇ ਨੂੰ ਕਿਹਾ ਕਿ ਜੇਕਰ ਮੋਬਾਈਲ ਉਸ ਦਾ ਹੈ ਤਾਂ ਉਸ ਨੂੰ ਬਾਕਸ ਅਤੇ ਬਿੱਲ ਦਿਖਾ ਦੇਵੇ। ਇਸ ਦੌਰਾਨ ਨੌਜਵਾਨ ਮੋਬਾਈਲ ਖੋਹ ਕੇ ਭੱਜਣ ਲੱਗਾ ਪਰ ਫੜਿਆ ਗਿਆ। ਸ਼ੁਭਮ ਨਾਲ ਉਸ ਦੀ ਮਾਮੂਲੀ ਝੜਪ ਵੀ ਹੋਈ। ਸਪਨਾ ਅਨੁਸਾਰ ਕੁਝ ਦੇਰ ਬਾਅਦ 8 ਤੋਂ 10 ਨੌਜਵਾਨ ਗਲੀ ਵਿੱਚ ਆ ਗਏ। 

ਬਦਮਾਸ਼ਾਂ ਨੇ ਸ਼ਰੇਆਮ ਇੱਟਾਂ ਅਤੇ ਪੱਥਰ ਸੁੱਟੇ। ਬਦਮਾਸ਼ਾਂ ਨੇ ਗਲੀ 'ਚ ਖੜ੍ਹੇ ਮੋਟਰਸਾਈਕਲ ਦੀ ਟੈਂਕੀ 'ਤੇ ਤੇਜ਼ਧਾਰ ਹਥਿਆਰਾਂ ਨਾਲ ਹਮਲਾ ਕਰਕੇ ਟੈਂਕੀ ਨੂੰ ਫਟ ਦਿੱਤਾ। ਪੈਟਰੋਲ ਖਤਮ ਹੋਣ 'ਤੇ ਇਕ ਨੌਜਵਾਨ ਨੇ ਮਾਚਿਸ ਦੀ ਸਟਿਕ ਨਾਲ ਬਾਈਕ ਨੂੰ ਅੱਗ ਲਗਾ ਦਿੱਤੀ। 

ਰੌਲਾ ਸੁਣ ਕੇ ਜਦੋਂ ਇਲਾਕੇ ਦੇ ਲੋਕ ਇਕੱਠੇ ਹੋ ਗਏ ਤਾਂ ਹਮਲਾਵਰਾਂ ਨੇ ਇਲਾਕੇ ਦੇ ਲੋਕਾਂ ਦੀਆਂ ਕਾਰਾਂ ਦੇ ਸ਼ੀਸ਼ੇ ਵੀ ਤੋੜ ਦਿੱਤੇ। ਹਮਲਾਵਰਾਂ ਨੇ ਕੁੱਲ 6 ਕਾਰਾਂ ਦੀ ਭੰਨਤੋੜ ਕੀਤੀ। ਘਟਨਾ ਤੋਂ ਤੁਰੰਤ ਬਾਅਦ ਪੁਲਿਸ ਨੂੰ ਸੂਚਨਾ ਦਿੱਤੀ ਗਈ। 

ਥਾਣਾ ਜਮਾਲਪੁਰ ਅਤੇ ਚੌਕੀ ਮੁੰਡੀਆ ਦੀ ਪੁਲਿਸ ਮੌਕੇ ’ਤੇ ਪੁੱਜ ਗਈ। ਪੁਲਿਸ ਮਾਮਲੇ ਦੀ ਜਾਂਚ ਵਿੱਚ ਜੁੱਟ ਗਈ ਹੈ। ਕੁਝ ਹਮਲਾਵਰਾਂ ਦੇ ਚਿਹਰੇ ਢਕੇ ਹੋਏ ਸਨ ਪਰ ਕੁਝ ਦੇ ਚਿਹਰੇ ਸਾਫ਼ ਦਿਖਾਈ ਦੇ ਰਹੇ ਸਨ। ਪੁਲਿਸ ਸੀਸੀਟੀਵੀ ਕੈਮਰਿਆਂ ਦੇ ਆਧਾਰ ’ਤੇ ਕਾਰਵਾਈ ਕਰ ਰਹੀ ਹੈ।