AI in cyber Security: ସାଇବର ସୁରକ୍ଷାରେ କୃତ୍ରିମ ବୁଦ୍ଧିମତ୍ତାର ବ୍ୟବହାର ନେଇ ଆଲୋଚନା

AI in cyber Security:କଟକ: ଶ୍ରୀ ଶ୍ରୀ ବିଶ୍ୱବିଦ୍ୟାଳୟ ପକ୍ଷରୁ ୨୦୨୫ ଜାନୁଆରୀ ୨୦ରୁ ୨୫ ତାରିଖ ପର୍ଯ୍ୟନ୍ତ ଉତ୍ସାହ ସହକାରେ କୃତ୍ରିମ ବୁଦ୍ଧିମତ୍ତା ସପ୍ତାହ ପାଳିତ ହୋଇଯାଇଛି । ଏଥିରେ ବିଭିନ୍ନ କ୍ଷେତ୍ରରେ କୃତ୍ରିମ ବୁଦ୍ଧିମତ୍ତା (ଏଆଇ)ର ଦ୍ରୁତ ବିକଶିତ ଦୁନିଆ ଏବଂ ଏହାର ପ୍ରଭାବ ବିଷୟରେ ଆଲୋଚନା ଓ ଅନୁସନ୍ଧାନ କରିବା ପାଇଁ ବିଶେଷଜ୍ଞ, ଶିକ୍ଷାବିତ୍ ଏବଂ ଶିଳ୍ପ ନେତାମାନେ ଆଭାସୀ ଜରିଆରେ ଏକାଠି ହୋଇଥିଲେ ।

ଜାନୁଆରୀ ୨୦ ତାରିଖ ଉଦଘାଟନୀ ସମାରୋହରେ ଶ୍ରୀ ଶ୍ରୀ ବିଶ୍ୱବିଦ୍ୟାଳୟର ସଭାପତି ପ୍ରଫେସର ରଜିତା କୁଲକର୍ଣ୍ଣି ଏବଂ କୁଳପତି ଡ. ତେଜ ପ୍ରତାପଙ୍କ ନେତୃତ୍ୱରେ ଏହି ସପ୍ତାହ ଆରମ୍ଭ ହୋଇଥିଲା। ବିଶ୍ୱବିଖ୍ୟାତ କମ୍ପାନୀ ‘ଇଣ୍ଟେଲ’ ପକ୍ଷରୁ ଏହାର ଅଧିକାରୀ ଶ୍ୱେତା ଖୁରାନା, ଆଇବିଏମ୍ ପକ୍ଷରୁ ଏହାର ପ୍ରତିନିଧି ମଣି ମଧୁକର ଏବଂ ମାଇକ୍ରୋସଫ୍ଟ ପକ୍ଷରୁ ପ୍ରତିନିଧି ଅରୁଣା ମହାନ୍ତିଙ୍କ ଭଳି ପ୍ରତିଷ୍ଠିତ ଶିଳ୍ପପତିଙ୍କ ସମେତ ଆଇଆଇଟି ଭୁବନେଶ୍ୱରର ପ୍ରଫେସର ଶୁଭ୍ରାଂଶୁ ରଞ୍ଜନ ସାମନ୍ତରାୟ ପ୍ରମୁଖ ଏଥିରେ ଯୋଗ ଦେଇଥିଲେ। ଏହାପରେ "କୃତ୍ରିମ ବୁଦ୍ଧିମତ୍ତା ବନାମ ସାଇବର ନିରାପତ୍ତା" ଉପରେ ଏକ ପ୍ୟାନେଲ ଆଲୋଚନା ହୋଇଥିଲା, ଯେଉଁଥିରେ ଏହି ଡୋମେନ୍ ଗୁଡିକ ମଧ୍ୟରେ ଆହ୍ୱାନ ଏବଂ ସମନ୍ୱୟ ଆଦି ସ୍ଥାନ ପାଇଥିଲା ।
ଆକର୍ଷଣୀୟ ବିଶେଷଜ୍ଞ ଆଲୋଚନା ଏବଂ ଇଣ୍ଟରାକ୍ଟିଭ୍ ଅଧିବେଶନ ସହିତ କାର୍ଯ୍ୟକ୍ରମର ପରିସମାପ୍ତି ଘଟିଥିଲା। ଜାନୁଆରୀ ୨୧ ତାରିଖ ସିକ୍ୟୋରଆଇର ପୁନିତ ଏବଂ ସିଦ୍ଧାର୍ଥ ମହାନ୍ତି ଏକ ଅନଲାଇନ ଅଧିବେଶନରେ ସାଇବର ସୁରକ୍ଷାର ସଦ୍ୟତମ ଧାରା ଉପରେ ଆଲୋକପାତ କରିଥିଲେ। ଏହାପରେ ୨୨ ତାରିଖ ଆଇବିଏମ୍ ପକ୍ଷରୁ ଶ୍ରୀ ହର୍ଷ କୁମାର ଏକ ଅଧିବେଶନରେ ନ୍ୟୁରାଲ ନେଟୱାର୍କ ସମ୍ପର୍କରେ ସ୍ପଷ୍ଟ ଆଲୋଚନା କରିଥିଲେ। ଜାନୁଆରୀ ୨୩ ତାରିଖ କାର୍ଯ୍ୟକ୍ରମର ଅଂଶଗ୍ରହଣକାରୀମାନଙ୍କୁ ସାଇବରଡୋଜୋ ପକ୍ଷରୁ ଆୟୁଷ ଯୋଶୀଙ୍କ ନେତୃତ୍ୱରେ "ସାଇବର ସୁରକ୍ଷାରେ କୃତ୍ରିମ ବୁଦ୍ଧମତ୍ତାର ବ୍ୟବହାର" ଉପରେ କ୍ୱିଜ୍ ଏବଂ ବିତର୍କ ଭଳି ଇଣ୍ଟରାକ୍ଟିଭ୍ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା । ଆର୍ଭି ଟେକ୍ ଲିୟରନର ରିତିକରାଜ ବୈଶ୍ୟ ଏଥିରେ ଯୋଗଦେଇ ଭବିଷ୍ୟତ ନିର୍ମାଣରେ କୃତ୍ରିମ ବୁଦ୍ଧିମତ୍ତାର ଭୂମିକା ଉପରେ ଆଲୋଚନା କରିଥିଲେ।

ଡିଜିଟାଲ ରୂପାନ୍ତରଣର ଅର୍ଥନୈତିକ ଏବଂ ବୈଷୟିକ ପ୍ରଭାବ ଉପରେ ଆଲୋଚନା କରିଥିବା ନାସକମର ଡ. ସନ୍ଧ୍ୟା ଚିନ୍ତଲାଙ୍କ ଏକ ସାରଗର୍ଭକ ଅଧିବେଶନ ସହିତ ଜାନୁଆରୀ ୨୪ ତାରିଖ ବେଶ୍ ରୋଚକ ପାଲଟିଥିଲା । କୁମାରୀ ମିଧ୍ୟା ରାଜ ଏବଂ ଅଲୱିନ ଜର୍ଜଙ୍କ ସମେତ ଏଚସିଏଲର ବିଶେଷଜ୍ଞମାନେ ମେସିନ୍ ନିଷ୍ପତ୍ତି ନେବାର ନୈତିକତା ଉପରେ ଆଲୋଚନା କରିଥିଲେ। ଅରବିନ୍ଦ ବର୍ଚ୍ଚଶ୍ୱୀ ଜୀ ଆୟୁର୍ବେଦ ବୁଦ୍ଧିମତ୍ତା ଏବଂ ଆଧୁନିକ ଜ୍ଞାନକୌଶଳ ସହିତ ଏହାର ମିଶ୍ରଣ ଉପରେ ଏକ ବକ୍ତବ୍ୟ ମାଧ୍ୟମରେ ପ୍ରାଚୀନ ଜ୍ଞାନକୁ କୃତ୍ରିମ ବୁଦ୍ଧିମତ୍ତା ସହ ଯୋଡ଼ି ଏକ ଅନନ୍ୟ ଦୃଷ୍ଟିକୋଣ ପ୍ରଦାନ କରିଥିଲେ । ଜାନୁଆରୀ ୨୦ରୁ ୨୪ ତାରିଖ ପର୍ଯ୍ୟନ୍ତ ଭବ୍ୟା ଶୁକ୍ଳାଙ୍କ ନେତୃତ୍ୱରେ ଇଣ୍ଟେଲ୍ ପକ୍ଷରୁ ଏକ ‘ଅଧ୍ୟାପକ ବିକାଶ କାର୍ଯ୍ୟକ୍ରମ’ ପ୍ରତିଯୋଗୀମାନଙ୍କୁ କୃତ୍ରିମ ବୁଦ୍ଧିମତ୍ତା କ୍ଷେତ୍ରରେ ଅତ୍ୟାଧୁନିକ ଦକ୍ଷତା ପ୍ରଦାନ କରିଥିଲା।

ଜାନୁଆରୀ ୨୫ ତାରିଖ "କ୍ୟାରିୟର ସମ୍ଭାବନାର ଅନୁସନ୍ଧାନ: ଏଆଇ ଏବଂ ଏମଏଲରେ ଇଞ୍ଜିନିୟରିଂ ସୁଯୋଗ" ଶୀର୍ଷକ ଥିମରେ ଆୟୋଜିତ ଗ୍ରାଣ୍ଡ ଫିନାଲେ ସହ ଏଆଇ ସପ୍ତାହ ଶେଷ ହୋଇଥିଲା । କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଏଆଇସିଟିଇର ଅଧ୍ୟକ୍ଷ ପ୍ରଫେସର ଟି. ଜି. ସୀତାରାମଙ୍କ ସମେତ ଆଇଆଇଟି ଭୁବନେଶ୍ୱରର ପ୍ରାଧ୍ୟାପକ ଶୁଭ୍ରାଂଶୁ ରଞ୍ଜନ ସାମନ୍ତରାୟ ପ୍ରମୁଖ ଉପସ୍ଥିତ ଥିଲେ। ସେମାନେ ମୁଖ୍ୟତଃ ‘ଏଆଇ ଏବଂ ଏମ୍ଏଲ୍’ର କ୍ୟାରିୟର ଏବଂ ପରିବର୍ତ୍ତନଶୀଳ ସମ୍ଭାବନା ବିଷୟରେ ଆଲୋଚନା କରିଥିଲେ । ଏହି କାର୍ଯ୍ୟକ୍ରମଟି ଶ୍ରୀ ଶ୍ରୀ ବିଶ୍ୱବିଦ୍ୟାଲୟର ଇଞ୍ଜିନିୟରିଂ ଓ ଟେକ୍ନୋଲଜି ବିଭାଗ ପକ୍ଷରୁ ଆୟୋଜିତ ହୋଇ ଅପାର ସଫଳତା ଲାଭ କରିଥିଲା । ବିଭାଗର ଆସୋସିଏଟ୍ ପ୍ରଫେସର (ଡ.) ସତ୍ୟଜିତ ପଟ୍ଟନାୟକ କାର୍ଯ୍ୟକ୍ରମ ସଂଯୋଜନା କରିଥିବା ବେଳେ ଏହା ଡିନ୍ ତଥା ସଂଯୋଜକ ପ୍ରଫେସର (ଡ. ) ରବିନାରାୟଣ ଶତପଥୀଙ୍କ ତତ୍ତ୍ୱାବଧାନରେ ପରିଚାଳିତ ହୋଇଥିଲା ।