मराठमोळा अभिनेता चिन्मय मांडलेकर सध्या प्रचंड चर्चेत आहे. या चर्चेचं कारण म्हणजे त्याचा मुलगा.
चिन्मयचा मुलगा जहांगीर याच्या नावामुळे सुरु असलेल्या ट्रोलिंगवरुन त्याच्या पत्नीने आवाज उठवल्यानंतर चिन्मयही याबाबतीत व्यक्त झाला आहे.
मुलाचं नाव जहांगीर ठेवल्यामुळे चिन्मय व त्याच्या कुटुंबियांना ट्रोल केलं जात आहे.
चिन्मय आणि त्याच्या कुटुंबाला देश सोडून जाण्यापासून ते अगदी नको त्या भाषेत लक्ष्य केलं जात आहे ‘भारत सोडून जा’, ‘अफगाणिस्तान किंवा पाकिस्तानात राहायला जा’, असे मेसेज ट्रोलर्सकडून अभिनेत्याला केले जात आहेत.
ट्रोलिंगचा कुटुंबाला मानसिक त्रास होत आहे असं सांगताना या ट्रोलिंगला कंटाळून चिन्मय मांडलेकरनं एक मोठा निर्णय व्हिडीओ पोस्ट करत जाहीर केला.
छत्रपती शिवाजी महाराजांच्या भूमिकेमुळे घरोघरात पोहचलेल्या चिन्मयने यापुढे महाराजांची भूमिका न साकारण्याचा निर्णय घेतला आहे.
चिन्मयच्या कुटुंबाबरोबर घडलेला प्रकार आणि त्याने घेतलेल्या या निर्णयानंतर काही मराठी कलाकारांनी त्याला पाठिंबा दिला आहे.
यामध्ये आता ज्येष्ठ अभिनेत्री सुप्रिया पिळगावकर यांचाही समावेश झाला आहे.
सुप्रिया पिळगावकर चिन्मय मांडलेकरच्या मुलाच्या नावावरुन सुरु असलेल्या वादासंदर्भात सोशल मीडियावरुन व्यक्त झाल्या आहेत.
सुप्रिया पिळगावकर यांनी इन्स्टाग्रामवर एक स्टोरी पोस्ट करत मोजक्या शब्दात आपली प्रतिक्रिया नोंदवली आहे.
'जहांगिर मांडलेकर! तुला अनेकानेक शुभ आशीर्वाद!' असं वाक्य सुप्रिया पिळगावकर यांनी आपल्या इन्स्टाग्राम स्टोरीला पोस्ट केलं आहे.