സത്യസന്ധത ജീവിതത്തില്‍ അത്യാവശ്യമായി വേണ്ട ഗുണമാണെങ്കിലും അമിതമായാല്‍ സത്യസന്ധതയും ദോഷം ചെയ്യുമെന്ന് ചാണക്യന്‍ പറയുന്നു. വളഞ്ഞുപുളഞ്ഞു വളരുന്ന മരങ്ങളെക്കാൾ നേരേ വളരുന്ന മരങ്ങളാണ് ആദ്യം വെട്ടിനീക്കപ്പെടുക. അതുപോലെ സത്യസന്ധരായ ആളുകള്‍ പെട്ടെന്ന് വഞ്ചിതരാക്കപ്പെടുമെന്ന് ചാണക്യനീതിയിൽ പറയുന്നു.
ഏതൊരു കാര്യവും ചെയ്യുന്നതിന് മുമ്പ് മൂന്ന് ചോദ്യങ്ങൾ സ്വയം ചോദിച്ച് അതിന് ഉത്തരം കണ്ടെത്താൻ ശ്രമിക്കണമെന്ന് ചാണക്യൻ പറയുന്നു. എന്തിന് വേണ്ടി ഞാന്‍ ഈ കാര്യം ചെയ്യണം, അതിന്റെ പരിണിതഫലങ്ങള്‍ എന്തെല്ലാമായിരിക്കും, അതില്‍ വിജയിക്കുമോ എന്നീ മൂന്ന് ചോദ്യങ്ങള്‍ സ്വയം ചോദിക്കുന്നത് ആ ദൗത്യത്തെ കുറിച്ച് ആഴത്തില്‍ ചിന്തിക്കാന്‍ സഹായിക്കുന്നു.
മാറ്റങ്ങൾ ജീവിതത്തിന്റെ ഭാഗമാണ്. അതിനാൽ മാറ്റത്തിന് തയ്യാറാകണമെന്ന് ചാണക്യൻ ഓർമിപ്പിക്കുന്നു. മാറ്റത്തിന് മുമ്പില്‍ ഭയപ്പെടാതിരിക്കുക. ഭയം വിജയത്തിന്റെ ശത്രുവാണ്. അതിനാൽ ഭയം അടുത്തുവരുമ്പോള്‍ തന്നെ ധീരതയാല്‍ അതിനെ നേരിടണം.
ജീവിത വിജയത്തിന് ഒരുമ ഏറ്റവും പ്രധാനമാണ്. ഒരുമയ്ക്ക് വില നല്‍കുകയും ഒറ്റക്കെട്ടായി മുന്നേറാന്‍ ശ്രമിക്കുകയും ചെയ്യുക. അതുപോലെ മറ്റുള്ളവരുടെ തെറ്റുകളിൽ നിന്ന് പാഠം പഠിക്കണമെന്ന് ചാണക്യൻ പറയുന്നു. അവർ വരുത്തിയ തെറ്റുകളെ മനസ്സിലാക്കി അവ ആവർത്തിക്കാതിരിക്കുക.
ഒരു വ്യക്തിയെ സംബന്ധിച്ച ഏറ്റവും വലിയ ഗുണങ്ങളില്‍ ഒന്നാണ് അച്ചടക്കം ഉണ്ടായിരിക്കുക എന്നത്. ഒരു കാര്യം സംസാരിക്കുന്നതിന് മുമ്പ് നൂറ് തവണ ആലോചിക്കുക. ആ സംസാരം ആവശ്യമാണോ, മറ്റുള്ളവരെ അത് വേദനിപ്പിക്കുമോ, അത് സത്യമാണോ എന്നുള്ള കാര്യങ്ങള്‍ ചിന്തിക്കുക.
വിദ്യാഭ്യാസത്തെ ആത്മസുഹൃത്തായി കാണണമെന്ന് ചാണക്യൻ ഓർമിപ്പിക്കുന്നു. വിദ്യാധനം സര്‍വ്വധനാല്‍ പ്രധാനമാണ്. വിദ്യാഭ്യാസമുള്ളവര്‍ സമൂഹത്തില്‍ എന്നും ആദരിക്കപ്പെടും. യുവത്വത്തേക്കാളും സൗന്ദര്യത്തേക്കാളും വിദ്യാഭ്യാസവും അറിവും വിലമതിക്കപ്പെടുന്നു.
ഏതൊരു സൗഹൃദത്തിലും ചില നിക്ഷിപ്ത താല്‍പ്പര്യങ്ങള്‍ ഉണ്ടായിരിക്കുമെന്നത് യാഥാർത്ഥ്യമാണ്. അതിനാൽ സുഹൃത്തുക്കളെ കണ്ണടച്ച് വിശ്വസിക്കരുതെന്ന് ചാണക്യൻ പറയുന്നു. ചാണക്യന്റെ ഈ ഉപദേശങ്ങള്‍ മനസ്സില്‍ വെച്ചുകൊണ്ട് പ്രവർത്തിച്ചാൽ കര്‍മ്മരംഗത്ത് ശോഭിക്കാനും വിജയിക്കാനും സാധിക്കും. (Disclaimer: ഈ വാർത്ത പൊതുവായ വിവരങ്ങളെ അടിസ്ഥാനമാക്കിയുള്ളതാണ്. സീ മലയാളം ന്യൂസ് ഇത് സ്ഥിരീകരിക്കുന്നില്ല.)
